Израиль АҚШ пен Иран арасындағы бітімнен кейін шектеулерді алып тастады

Израиль әскері АҚШ пен Иран арасындағы уақытша бітімге қол жеткізілген соң елдегі бұрын енгізілген шектеулердің басым бөлігін алып тастады, деп хабарлайды АА. 

Тыл қолбасшылығы шешімнің 9 сәуір күні таңғы 06:00-ден бастап күшіне енгенін хабарлады.

• Білім беру: Елдің көп бөлігінде дәстүрлі сабақтар қайта басталды. Солтүстік аймақтарда (Ливан шекарасы, Голан жоталары, Хайфа маңы) тек паналау орындары бар ғимараттарда оқуға рұқсат етілді.
• Жұмыс орындары: Солтүстік өңірлерде кәсіпорындар тек паналау орындарына жақын болса ғана ашылады.
• Жиналыстар: Жабық ғимараттарда 200 адамға дейін, ашық алаңда 50 адамға дейін жиналуға рұқсат берілді.
• Қалған аумақтарда: Барлық дерлік шектеулер алынып, оқу мен жұмыс толық қалпына келді.

Бұған дейін шектеулер Израиль мен АҚШ-тың Иранға қарсы шабуылдарынан кейін енгізілген еді. 5 наурызда билік экономикалық жағдайдың нашарлау қаупіне байланысты кейбір шараларды жұмсартқан болатын.