В Атырау -10 
«Хезболла» қозғалысы Израильдің солтүстігіндегі Манара елді мекеніне зымыран соққысы жасағанын мәлімдеді, деп хабарлайды АА.
Ұйымның жазбаша хабарламасында бұл әрекет Израиль тарапынан жасалған бітім бұзушылықтарға жауап ретінде және Ливан халқын қорғау мақсатында жүзеге асқаны айтылған.
«Исламдық қарсылық» режимді сақтап отырғанын, алайда Израильдің оны бұзуды жалғастырып жатқанын атап өтті. Ұйымның дерегінше, соққы 9 сәуір күні түнгі 02:30-да жасалған. Бұл оқиға бітім күшіне енгеннен кейінгі алғашқы шабуыл болып отыр.
Алдыңғы күні Израиль әскері Ливан аумағына ауқымды әуе шабуылдарын жасаған. Күндіз алдын ала ескертусіз Бейрут пен елдің шығыс және оңтүстік аймақтарына шамамен 100 бір мезгілде авиация соққысы жасалды. Кешке Израиль ұшақтары астанадағы «Тель Хаят» ауданын да атқылады. Бұл соққылар 2 наурыздан бергі ең ауқымды шабуылдар болып саналады. Соңғы деректер бойынша, қаза тапқандар саны 254-ке жеткен, оның ішінде 92 адам Бейрутта.
АҚШ президенті Дональд Трамп 8 сәуірде Иранмен екі аптаға уақытша бітімге келіскенін жариялаған еді. Ол келісім Ормуз бұғазының ашылуы шартында жүзеге асатынын айтты. Иран Ұлттық қауіпсіздік жоғарғы кеңесі елдің өз мақсаттарына жеткенін мәлімдеп, Исламабадта 15 күн ішінде келіссөздерді аяқтауды жоспарлап отыр.
Түркия, Пәкістан және Мысыр тараптарды диалогта ұстап тұру үшін белсенді дипломатиялық қадамдар жасауда. Израиль уақытша бітімді қолдағанымен, оның Ливанға қатысты қолданылмайтынын мәлімдеп, әскери операцияларын жалғастырып отыр.