В Атырау +1 
Атыраудағы «Атырау» спорт кешенінде 2011–2013 жылдары туған мектеп оқушылары арасында грек-рим және еркін күрестен облыстық фестиваль өтті. Бұл турнир облыстың алғашқы спорт шеберлерінің құрметіне арналды. Жарысты «Барыс» клубы ұйымдастырды, ал демеушісі – First National Company компаниясы.
22 салмақ дәрежесінде 88 қатысушы ақшалай марапатталды. Ең кішкентай жеңімпаздар 50 доллардан, ал басқа санаттағы жеңімпаздар 10–20 мың теңге көлемінде сыйлық алды. Алты үздік спортшы компьютермен марапатталды. Жарыстың жалпы сыйлық қоры – 1 миллион 500 мың теңге. Турнир басталар алдында қатысушылар Меңдігерей Хайруллин, Мырзабек Атбаев, Айдар Сарбаев, Анатолий Ли, Мұрат Колбанов, Садыржан Жексенов, Вячеслав Чигрин және Сулико Козоновты бір минут үнсіздікпен еске алды.
*
Ыстықкөлде алғаш рет WKF карате бойынша халықаралық турнир өтті. Атырау намысын негізінен 12–13 жас аралығындағы «Қайсар» клубының шәкірттері қорғады. Жас спортшылар көп медаль алып, К. Сағынш, Рахымжан Нұрхан, Арсен Жандарбекұлы және Павел Әлихан чемпион атанды.
*
10–15 қыркүйек аралығында жасөспірімдер дзюдосы бойынша Джакартада өткен Азия чемпионатында атыраулық спортшылар көзге түсті. 57 келіге дейінгі салмақта Жұмажан Інжу чемпион атанды, 66 келіге дейінгі салмақта Бақтығали Заманбек күміс медаль алып, 70 келіге дейінгі жасөспірімдер арасындағы санатта Шынар Бітімбай жүлдегер болды.
*
Әбу-Дабиде муай-тайдан өткен әлем чемпионатында «Қайсар» спорт клубының шәкірттері екі күміс және екі қола медаль жеңіп алды. Әли Ильясов, Аделина Гатиятуллина, Көркем Нәби және Айзере Берікова жүлдегерлер атанды. Әлемдік додаға 112 елдің спортшылары қатысты, ал Қазақстан құрамасы жалпы медаль саны бойынша үшінші орынды иеленді.
Мұрат СҰЛТАНҒАЛИЕВ