Әбиба Әбужақынова әлемдік рейтингте екінші орынға көтерілді

Қазақстандық дзюдошы Абиба Әбужақынова Халықаралық дзюдо федерациясының (IJF) жаңартылған әлемдік рейтингінде екінші орынға көтерілді.

Бұл жетістікке ол Будапештте өткен әлем чемпионатындағы жарқын өнерінің арқасында қол жеткізді. Қазақстан дзюдосы тарихында алғаш рет финалға шыққан Әбужақынова 48 келіге дейінгі салмақ дәрежесінде күміс медаль жеңіп алды. 5662 ұпаймен ол екі саты жоғарылап, әлемнің үздік екі дзюдошысының қатарына енді.

Әбибаның бұл табысы – Қазақстан құрамасының жалпы қарқынды дамуының көрінісі. Олимпиада чемпионы Елдос Сметов биыл жарыстарға қатыспаса да, рейтингтегі 9-орнын сақтап қалды. Олимпиада жүлдегері және әлем вице-чемпионы Ғұсман Қырғызбаев 7 сатыға жоғарылап, ТОП-10 қатарына енді.

Басқа қазақстандық дзюдошылардың да жетістіктері назар аударарлық:

• Мәжжан Шамшадин (60 кг дейін) – 19-орын;

• Абылайхан Жұбаназар (81 кг) – 14-орынды сақтап қалды;

• Нұрлыхан Шархан (100 кг) – 26-орында қалды;

• Мейірлан Максим (90 кг дейін) – бірден 36 саты жоғарылап, 41-орынға шықты;

• Ерасыл Қажыбаев (100 кг жоғары) – 7 орынға көтеріліп, ТОП-20 қатарына енді.

Будапешттегі әлем чемпионаты Қазақстан дзюдосы үшін маңызды кезең болды. Бұл ел құрамасының дайындық деңгейінің жоғары екенін және алдағы халықаралық жарыстарда жүлде алу мүмкіндіктерінің мол екенін көрсетті.