В Атырау
+13 
Атырау облыстық сотының қылмыстық істер жөніндегі алқасы Атырау қаласының бұрынғы әкімі Қайрат Оразбаев пен әкімдіктің бұрынғы лауазымды тұлғаларына қатысты қылмыстық іс бойынша апелляциялық шағымдарды қарады.
Бұрынғы әкім және сәулет басқармасының бұрынғы басшысы Ерлан Қабденов ҚР Қылмыстық кодексінің 361-бабының 4-бөлігі, 3-тармағы («Ауыр зардаптарға әкеп соққан лауазымдық өкілеттіктерін теріс пайдалану») бойынша кінәлі деп танылды. Ерлан Қабденов 5 жылға, Қайрат Оразбаев 3 жылға бас бостандығын шектеу жазасын алды. Сонымен қатар, бұрынғы әкім мемлекеттік наградаларынан, оның ішінде «Құрмет» орденінен айырылды.
Жер қатынастары бөлімінің бұрынғы басшысы Наурызбек Құмаров осы баппен, сондай-ақ 369-баптың 1-бөлігімен кінәлі деп танылып, 6 жылға бас бостандығынан шектелді.
Үшеуіне де өмір бойына мемлекеттік қызметте жұмыс істеу құқығынан айырылды.
Сонымен бірге, әкім аппаратының бұрынғы басшысы Жігер Ибатоллаұлы 361-баптың 4-бөлігінің 3-тармағы бойынша қылмыс құрамының болмауына байланысты ақталды. Сондай-ақ, Қайрат Оразбаев (369-баптың 3-бөлігі), Ерлан Қабденов пен Жігер Ибатоллаұлы (369-баптың 1-бөлігі) кінәсіз деп танылды. Сонымен қатар, үшеуі де қылмыс құрамының жоқтығына байланысты 190-баптың 4-бөлігінің 2-тармағы бойынша ақталды.
Атырау облыстық сотының баспасөз қызметі: "Апелляциялық сот алқасы бірінші сатыдағы соттың үкімін өзгеріссіз қалдырды. Оның күшін жоюға немесе өзгертуге негіздер анықталған жоқ" деп хабарлады.
Еске салайық, әкімдіктің бұрынғы шенеуніктері жер телімдерін заңсыз бөлді және қызметтік өкілеттіктерін асыра пайдаланды деп айыпталған болатын.
Нұрбейбіт НҰҒМАНОВ