В Атырау +3.8 
Қазақстанның Қаржылық мониторинг агенттігі халықаралық Pin-Up ойын брендімен байланысы бар Дмитрий Пунин мен Марина Ильинаны іздеуге жариялады. Олар туралы ақпарат Қазақстан Республикасы Бас прокуратурасының іздеуде жүрген адамдар базасында пайда болды.
Журналист Михаил Козачковтың мәліметінше, іздеу заңсыз онлайн-казинолардың қызметіне қатысты тергеумен байланысты. Тергеу нұсқасы бойынша, бұл ойын алаңдары арқылы қазақстандық ойыншылардың миллиардтаған теңгесі айналымға түсуі мүмкін.
31 қазанда журналист Михаил Козачков іздеуде жүрген адамдар туралы карточкалардың пайда болғанын хабарлады. Ол жариялаған мәліметтерге сәйкес, Дмитрий Пунин мен Марина Ильинаны іздеуге Қазақстанның Қаржылық мониторинг агенттігі бастамашы болған.
Карточкаларда тиісті іздестіру істері 2026 жылғы 30 қазанда тіркелгені көрсетілген. Іздестіру жұмыстарын Астана қаласы бойынша Экономикалық тергеп-тексеру департаменті жүргізіп жатыр.
Козачковтың мәліметінше, Пунин мен Ильина – Кипрде тұратын ерлі-зайыптылар. Журналист оларды Pin-Up букмекерлік бизнесінің иелері деп атайды.
Болжамды схема қалай жұмыс істеген?
Қазақстанда Pin-Up және Pinco брендтерімен жұмыс істеген онлайн-казинолардың қызметіне қатысты тергеу біраз уақыттан бері жүргізіліп келеді.
2026 жылдың ақпанында Қаржылық мониторинг агенттігі тергеу нұсқасы бойынша, аталған онлайн-платформалардың қызметін шетелден өзара байланысты компаниялар желісі арқылы әрекет еткен адамдар тобы ұйымдастырғанын хабарлаған болатын.
Заңсыз қызметті жасыру үшін PIN-UP.KZ брендімен букмекерлік қызмет жүргізуге мемлекеттік лицензия алған «Бонами» ЖШС пайдаланылған.
Сонымен қатар тергеу нұсқасы бойынша, заңды букмекерлік бизнестің артында Қазақстанда тыйым салынған онлайн-казинолардың жұмысын қамтамасыз ететін инфрақұрылым жасырынған.
Ойыншылардың қаражатын қабылдау және шығару үшін төлем ұйымдары, соның ішінде Gold Pay және кейіннен Pinnacle Financial Solutions болып қайта аталған Cyber Pay пайдаланылған.
ҚМА мәліметінше, клиенттердің ақшасы транзиттік шоттарға түсіп, одан кейін өзара байланысты компанияларды пайдалану арқылы криптовалютаға айырбасталған.
Бұған дейін екі ұйымдастырушы іздеуге жарияланған
Ақпан айында ҚМА Дмитрий Дружинский мен Марина Левковичті (Гинзбург) іздеуге жариялаған болатын.
Ведомство олардың Қазақстан аумағында заңсыз ойын бизнесін ұйымдастырды деген күдікке ілінгенін хабарлады.
Тергеу материалдарына сәйкес, күдіктілер өзара байланысты компаниялардың қызметін үйлестіріп, көмекшілерді іріктеген, банктермен және төлем ұйымдарымен байланыс орнатқан, сондай-ақ ақша аударымдарына арналған инфрақұрылымды құруға қатысқан.
Сот олардың екеуіне де сырттай қамауда ұстау түріндегі бұлтартпау шарасын санкциялаған.
Михаил Козачковтың мәліметінше, тергеу аясында қаржы ағындарына қызмет көрсетуге заңсыз ойын бизнесін ұйымдастырушыларға көмектесуі мүмкін банктер қызметкерлері мен қазақстандық мамандардың ықтимал рөлі де тексерілген.
Журналистің айтуынша, осы схема арқылы қазақстандықтар ұтылған ақшаның жалпы көлемі 100 млрд теңгеге жеткен.
Енді тергеу бизнес иелері болуы мүмкін тұлғаларға назар аударды
Козачковтың сөзінше, осы уақытқа дейін ойын бизнесінен негізгі пайда тапқан тұлғалардың ықтимал жауапкершілігі мәселесі ашық күйінде қалған.
Пунин мен Ильинаға қатысты іздеу карточкаларының пайда болуы тергеудің жаңа кезеңге өткенін көрсетеді.
Сонымен бірге жарияланған карточкалар олардың іздеуге жарияланғанын растайды, алайда іздеудегі әр адамға нақты қандай күдік келтірілгені туралы ақпарат ашып көрсетілмеген.