​Дидар Сыдықбек - «Атырау» футбол клубының жаңа басшысы

Сыдықбектің тағайындалғанын футбол клубының баспасөз қызметі хабарлады.

«Атырау» ФК бас менеджері 32 жастағы функционер, Алматы тумасы Дидар СЫДЫҚБЕК болды. Футболшы ретінде Қазақстанның жастар құрамасында, «Қызылжар», «Астана-1964», «Ақтөбе» және «Ордабасы» клубтарының намысын қорғады. Мансабын аяқтағаннан кейін «Прогресс KZ» талдау қызметінің басшысы, «ИТЦ» АҚ бақылау бөлімінің маманы және Тұңғыш Президент қорының жобалық кеңсе үйлестірушісі қызметтерін атқарды.

Басқарушылық мансабын SD Family Group директоры ретінде бастаған ол медиа-футбол федерациясының президенті лауазымына дейін көтерілді. Сыдықбек Қазақстан футбол федерациясының «Алаң» инфрақұрылымдық жобасының кеңесшісі де болған.

Еске салайық, бұған дейін «Атырау» ФК қызметкерлері Атырау облысының әкімі Серік Шәпкеновке видео үндеу жолдаған болатын. Кейінірек дене шынықтыру және спорт басқармасы футбол клубындағы жағдайға қатысты пікір білдірді.

Жомарт ӘМІРХАНОВ