Жаңа Салық кодексі: Сарапшы кінәліні іздемей, шығындарды санауға шақырады

Ұлттық экономика министрлігі жабық отырыста жаңа салық кодексіне қатысты тәсілдерді тағы да талқылады. Шара қорытындысы бойынша пікір білдірген сарапшы Александр Даниловтың айтуынша, салық мөлшерлемелерін арттыру, жаңа алымдар енгізу және кәсіпкерлерге бақылауды күшейту арқылы «бюджетті толтыру» басты назарда болды.

«Ведомство өз шығындарын қысқарту мәселесін қозғамастан, негізгі ауыртпалықты бизнес пен азаматтарға артып жатқандай», - деп атап өтті Данилов. Оның пікірінше, мемлекеттік сектордың тиімділігіне толық талдау жасап, тиімсіз бағдарламаларды қысқартудың орнына мемлекет қосымша табыс көздерін іздеуді жөн көреді.

Сарапшы үкімет салық төлеп жүргендерге қосымша төлемдерді жүктеп қана қоймай, салық салу базасын кеңейтіп, сұр бизнесті көлеңкеден шығаруға ынталандыруға көбірек көңіл бөлуі керектігін қадап айтты. Сонымен қатар, Данилов экономика белсенді дамымаса және жаңа өсу секторы болмаса, қазынаны тұрақты толықтыруға қол жеткізу мүмкін емес деп санайды.

«Өндірілетін құндылықтан салық алынады, оны арттырмай, бюджетті тұрақтандыру мүмкін емес. Бұл тек қанша жинау керектігі туралы ғана емес, оны қалай дұрыс жұмсау туралы да болуы керек. «Мемлекеттік бюджет түбі жоқ құдық емес», - дейді ол.

Даниловтың пікірінше, шамадан тыс салық жүктемесі кәсіпкерлерді көлеңкеге түсуге немесе бизнесін жабуға итермелеуі мүмкін, бұл ұзақ мерзімді перспективада экономикаға кері әсерін тигізеді. Сарапшы үкіметті салық саясатында тек фискалдық шараларға ғана емес, іскерлік белсенділікті ынталандыруға да назар аудара отырып өзгертуге шақырады.

Ұлттық экономика министрлігі жаңа салық кодексіне қатысты сынға әзірге ешқандай ресми түсініктеме берген жоқ. Құжат жобасы алдағы айларда қоғамдық талқылауға ұсынылмақ.