«Апатты деп танылға​н мектеп оқушыларына автобус тиесілі емес​»

Атырау қаласында апатты деп танылған №10 С.Мұқанов атындағы орта мектебінің ата-аналары қазіргі кезде уақытша өзге мектепте барып оқуға мәжбүр болған балаларды тасымалдайтын автобус беруді сұрайды. 

"Мектебіміз апатты деп танылғалы, балаларымызды біресе №34 мектепке, біресе №27 мектепке көшіріп жүргенімізге екі жыл болды. Қазан айында сүріліп, жаңадан салады деп хабарлағанымен әлі де бір кірпіші қозғалмаған. Жаңа мектеп салынғанша оқушылардың көрші мектептерге қатынап оқуына жағдай жасап, неге автобустар бөлінбейді?", - дейді ата-аналар. 
 
Олардың айтуынша, бір үйден 2-3 бала сабаққа баратын отбасылар бар. 

"Балаларды қоғамдық көлікпен жіберіп, үйде кішкентай баламен қалған кезде, балалар мектепке жетті ме, деп уайымдап отырамыз. Балалар автобусы тым болмаса бастауыш сыныпқа берілсе" дейді олар. 
 
Атырау облыстық білім беру басқармасының мәліметіне сүйенсек, №10 С.Мұқанов атындағы орта мектептің ғимараты апатты деп танылып, ғимаратты бұзу және орнына 300 орындық мектеп салуға ұсыныс берілген. 

- Қазіргі уақытта мектеп оқушылары №27 И.Тайманов атындағы орта мектепте білім алуда. Мектеп қаланың ортасында орналасқан, қоғамдық көліктер жүріп жатыр. ҚР Білім және ғылым министрінің 2022 жылғы 6 мамырдағы №185 бұйрығына сәйкес, оқушыларды автобуспен тасымалдау мектеп пен білім алушылар тұрақты тұратын елді мекеннің ара қашықтығы 3 километрден алыс болған жағдайда ұйымдастырылады. №10 мектеп оқушыларын тасымалдау қолданыстағы заңнамаға қайшы келетіндіктен, автобус бөлу мүмкін еместігін қаперге береміз, - деді облыстық білім беру басқармасының баспаөз қызметі. 

Атырау облыстық сәлет және құрылыс басқармасынан анықтағанымыздай, №10 С.Мұқанов атындағы орта мектептің апатты жағдайдағы ғимаратын бұзып, орнына 300 орындық жаңа мектеп салу үшін жобалық сметалық құжаттары жасақталған. Қазіргі уақытта сметалық құжаттары мемлекеттік сараптамаға жолданған.

Нұрбейбіт НҰҒЫМАНОВ