В Атырау +11.5 
Қазақстанның Каспий теңізіндегі аумағында шекарашылар мемлекеттік органдармен бірлесіп, заңсыз әрекеттерге қарсы ауқымды рейдтер жүргізді. Қазан айында 126 құқық бұзушы мен 44 шағын жүзу құралы ұсталып, браконьерлік аулау құралдарының 88 шақырымы және 11,5 келі есірткі тәркіленді.
Арнайы жедел-профилактикалық іс-шаралар 2026 жылдың қазан айы бойы Каспий теңізінің акваториясында өткізілді.
ҰҚК Шекара қызметінің мәліметінше, операциялар теңіздегі заңсыз әрекеттердің, соның ішінде браконьерлік пен өзге де құқық бұзушылықтардың жолын кесуге бағытталған.
Браконьерлік ау құралдарынан 2,3 мыңнан астам балық құтқарылды
Рейдтердің басты нәтижелерінің бірі – заңсыз балық аулау құралдарының 88 шақырымын тәркілеу.
Табылған аулардан шекарашылар бекіре және басқа да балық түрлерінің 2 337 данасын анықтады.
ҰҚК мәліметінше, табылған балықтардың барлығы табиғи мекендеу ортасына қайта жіберілді.
Есірткі тәркіленіп, ондаған кеме ұсталды
Браконьерлікпен күрес шараларынан бөлек, іс-шаралар барысында 11,5 келі есірткі заты тәркіленді.
Бір ай ішінде шекарашылар барлығы 126 құқық бұзушы мен 44 шағын жүзу құралын ұстады.
Алдын алынған залал 840 млн теңгеден асты
Қазан айындағы рейдтердің қорытындысы бойынша құқық бұзушыларға жалпы сомасы 4,5 млн теңгеден асатын әкімшілік айыппұл салынды.
Ал Шекара қызметінің бағалауынша, мемлекетке келтірілуі мүмкін алдын алынған залал 840 млн теңгеден асты.
ҰҚК Каспий теңізінің акваториясындағы заңсыз әрекеттердің жолын кесу шаралары жалғасып жатқанын атап өтті.
Шекара қызметі азаматтар мен шағын жүзу құралдарының иелеріне теңізде болудың белгіленген режимдері мен қағидаларын сақтау қажеттігін еске салды.