Махамбет ауданына қарасты 12 ауылда су тазарту қондырғысы қайта жаңғыртылуда

Реконструкциялау барысында Жалғансай, Таңдай, Алға, Ортақшыл, Ақжайық, Ақтоғай, Есбол,Сарайшық, Бейбарыс және Сарытоғай ауылдық округтеріндегі су тазарту қондырғылары жаңа заманауи техникалық құралдармен жабдықталуда, - деп хабарлайды Өңірлік коммуникациялар қызметі.

- Қазір Жалғансай ауылына фильтр орнатылып, ауыз су берілді. Жыл аяғына дейін мұндағы қосымша құрылыс жұмыстарын аяқтау жоспарлануда. Бұдан бөлек, биыл бұрын-соңды су құбыры тартылмаған шалғайдағы шағын 6 елді мекеннің ауыз су мәселесі шешілуде. Атап айтқанда Есмахан, Көздіқара, Томан, Атамбаев, Бала Ораз және Кеңөріс елді мекеніне су тазарту қондырғысы орнатылып жатыр, - деді аудандық ТҮКШ, жолаушылар көлігі және автомобиль жолдары бөлімінің басшысы Асылхан Шакимов.

Оның айтуынша, қазір Бала Ораз елді мекеніне ауыз су беріліп, қосымша құрылыс жұмыстары жүріп жатыр. Сондай-ақ Есмахан және Атамбаев елді мекеніне су желілері жүргізіліп, мұнара орнату сатысында, ал Көздіқарадағы жұмыстар 90 пайызға аяқталған.