В Атырау
-5 
АҚШ-тың сайланған президенті Дональд Трамп Айова штатының беделді Des Moines Register газетіне, оның бас компаниясына және бұрынғы сауалнама жүргізуші Дж. Энн Зельцерге қарсы сот ісін бастады, деп хабарлайды "Адырна" ұлттық порталы ВВС-ге сілтеп.
Трамп оларды 2024 жылғы президенттік сайлау алдындағы «сайлауға өрескел араласу» әрекеті үшін айыптап отыр.
2 қарашада жарияланған сауалнамада Трамптың Айова штатында Камала Харриске бірнеше пайыздық көрсеткіш бойынша ұтылып жатқанын көрсеткен. Бұл штатта Трамп 2016 және 2020 жылдары айқын жеңіске жеткен болатын. Сауалнама авторы Дж. Энн Зельцердің зерттеулері бұрыннан жоғары беделге ие болған. Бірақ Трамп бұл жолғы нәтижелерді «қасақана бұрмалаушылық» деп атады.
Трамптың айтуынша, сауалнама нәтижелері «қоғамдық пікірді манипуляциялау және сайлау нәтижелеріне әсер ету үшін» жасалған. Дегенмен, сайлау күні Трамп Айова штатында 13 пайыздық артықшылықпен жеңіске жетті.
Сотта Трамп Des Moines Register басылымынан қаржылық өтемақы төлеуді және сауалнама нәтижелерінің барлық әдіснамалық деректерін ашуды талап етті.
«Менің ойымша, бұл тек бұрмалау емес, тікелей алаяқтық пен сайлауға араласу. Мұндай жағдайлармен күресу керек», — деді Трамп баспасөз мәслихатында.
Газет өкілі Ларк-Мари Антон сауалнама әдіснамасы толық жарияланғанын және соңғы нәтижелердің Трамптың жеңісін дәл көрсетпегенін мойындады. Ол басылымның іс-әрекетін заңды деп санап, сот талаптарының орындалмауын күтетінін айтты.
Бұл оқиға Трамптың АҚШ медиасына қатысты сыншыл көзқарасының жалғасы ретінде қарастырылуда. Бұған дейін ABC News телеарнасы Трампқа қатысты мәлімдемесі үшін кешірім сұрап, оның қоры мен болашақ музейіне 15 млн доллар қайырымдылық төлеуге келіскен.
Айта кетейік, Трамптың АҚШ медиасына қарсы бұл әрекеті оның сайлаудағы жеңісінен кейін де жалғасып отыр.