Лавров НАТО-ға ескерту жасады

Ресей НАТО немесе оның кейбір мүше елдері Мәскеуге қарсы агрессивті әрекеттер жасаған жағдайда Мәскеудің жауабы адекватты болатынын ескертеді, деп мәлімдеді  РФ сыртқы істер министрі Сергей Лавров РИА Новости агенттігіне берген сұхбатында. Бұл туралы Sputnik хабарлайды.

"Біздің қарсыластарымыз адаспауы керек. НАТО немесе оның кейбір мүше мемлекеттері біздің елімізге қарсы агрессивті әрекеттер жасаған жағдайда БҰҰ Жарғысында бекітілген Ресейдің өзін-өзі қорғау және кез келген құралдарды пайдалану арқылы оның қауіпсіздігін қамтамасыз ету құқығына сәйкес адекватты жауап қайтару шаралары қабылданады", - деді Лавров.

Ол "НАТО бұрыннан Ресейге қатысты агрессивті саясатын жасырмайтынын" ескерусіз қалдыруға болмайтынын атап өтті.

Министр альянстың стратегияларында Ресей "қауіпсіздікке ең маңызды және тікелей қатер" ретінде сипатталатынын, ал НАТО басшылығы таяу жылдары Ресей НАТО-ға мүше қайсыбір елге шабуыл жасайтынын қайталап айтудан шаршамайтынын еске салды.

Ол егер Киев Ресей аумағына терең соққы беру үшін батыстың ұзақ қашықтықтағы қаруын қолданса, "бұл Украина ғана емес, НАТО елдері де Ресеймен ашық соғысып жатқанын білдіреді" деп мәлімдеді.