Атыраудағы мектептер мен балабақшалар тексерілгеннен кейін 50-ден астам лауазымды тұлға жауапкершілікке тартылды

Атырау қалалық прокуратурасы қадағалау аумағындағы білім беру және мектепке дейінгі ұйымдардың қызметіне тексеру жұмыстарын жүргізді, деп хабарлайды ведомствоның баспасөз қызметі.

Тексеріс барысында санитариялық-эпидемиологиялық, өрт, медицина саласында заң бұзушылықтар анықталды.

Атап айтқанда, санитариялық-эпидемиологиялық бақылау басқармасымен 63 040 900 теңге  (14 жеке, 42 мем. мектеп / 30 жеке, 20 мем.балабақша), Медициналық және фармацевтикалық бақылау департаментімен  4 287 360 теңге (9 жеке, 2 мем. мектеп / 14 жеке, 8 мем.балабақша), Төтенше жағдай басқармасымен 1 218 360 теңге (3 жеке, 1 мем.мектеп / 20 жеке, 20 мем.балабақша), Білім саласында сапаны қамтамсыз ету департаментімен 11 795 940 теңге (12 жеке/ 47 мем.мектеп /11 жеке, 1 мем.балабақша), еңбек инспекциясымен1 772 160 теңге (2 жеке мектеп / 4 жеке балабақша) айыппұл салынды.

Тексеріс қорытындысымен 260 прокурорлық қадағалау актісі енгізіліп,нәтижесінде 51 лауазымды тұлға тәртіптік жауаптылыққа тартылды және мемлекет пайдасына 82 114 720 теңге айыппұл өндірілді.

Сонымен қатар, алаяқтық жолмен мемлекеттен заңсыз 16,5 млн теңге алған үш балабақша меңгерушісіне қатысты сотқа дейінгі тергеп-тексеру басталды.

Қазіргі уақытта көрсетілген сома мемлекетке толық қайтарылды.