Каспий теңізінің жаңа ластану көзі анықталды

Ресей ғалымдары шалғайдағы өнеркәсіп орталықтарынан ауаға таралатын ластаушы заттардың күрделі атмосфералық айналым процестеріне байланысты Каспий теңізіне түсуі мүмкін екенін анықтады. Зерттеу туралы ТАСС агенттігіне «РҒА А.О.Ковалевский атындағы оңтүстік теңіздер биологиясы институтының» ФЗО ғылыми қызметкері Владимир Табунщик хабарлады. 

«Біз Каспий теңізіне құятын өзен бассейндерін зерттеу үшін қашықтан бақылау құралдарын пайдаланамыз.  Жұмыс тамыз айында басталды, бірақ бізде бастапқы деректер бар. Мысалы, екі шетелдік өзен бассейні аумағындағы ауаның айтарлықтай ластанғанын анықтадық. Ал ластану көзі бұл аумақта емес, Каспий жағалауынан алыс – өнеркәсіптік орталықтарда екені анықталды», - деді Табунщик.

Ол өнеркәсіп қалдықтарымен ластанған ауа массаларының ұзақ қашықтыққа қозғалуы атмосферадағы циркуляциялық процестерге байланысты деп түсіндірді. Қазір зерттеу авторлары шығарынды көздері мен олардың таралуы туралы ақпаратты нақтылауда.

Агенттік сұхбатшысы метеоспутниктердің бірінің арқасында ластануды анықтау мүмкін болғанын түсіндірді. «[Спутниктің жабдығы] ауаның күйін жазып алады және бірнеше ластаушы заттарды ажыратуға мүмкіндік береді. Дегенмен, бәрін емес. Біздің жағдайда азот диоксиді, күкірт диоксиді, формальдегид, метан, озон, көміртек моноксидін анықтадық. Әзірге нақты мәндерді айта алмаймын, деректер талданып жатыр, бірақ бұл кезеңде де ластану деңгейі, мысалы, Ресейдегі өзен бассейндеріне қарағанда айтарлықтай жоғары екені анық», - деп атап өтті Табунщик. Оның айтуынша, 2025 жылы экспедиция жоспарланып отыр. Ол бізге Каспий теңізіне құятын өзендердің суына зиянды заттардың қаншалықты көп түсетінін және олар, мысалы, өзен түбіндегі шөгінділерге жинала ма, жоқ па, анықтауға мүмкіндік береді.