​Атырау облысында қай мектепте және қалай​ күрделі жөндеу жүргізіліп жатыр

Мердігерлер жобаланған тапсыру мерзімін кешіктіріп, оқушылардың ата-аналары мен педагогика ұжымының наразылығын тудырып жатады. Атырау облысындағы жөндеу жүргізіліп жатқан, сондай-ақ осы жылы күрделі жөндеуден кейін пайдалануға берілген мектептерге шолу жасайық.

Өңірдегі оқу орындарының едәуір бөлігі сонау кеңес заманында салынған, бірақ тозығы жеткен ғимараттарды ретке келтірудің артықшылығы да, кемшілігі де бар.

Облыстық білім басқармасының мәліметінше, бүгінде Атырау қаласындағы жағдай мынадай.

Жақсы жағынан бастайық. Биыл мердігер «BestStroy Group» ЖШС мерзімінен бұрын, 1 қыркүйекке дейін Дамбы ауылындағы Амангелді атындағы мектепте күрделі жөндеу жұмыстарын аяқтады. Бюджеттен бөлінген сома - 401,7 млн теңге.

Тайманов атындағы №27 мектеп ашылды, мұнда жұмыстар былтыр басталған болатын (сомасы – 418 млн, мердігер – «Азамат Құрылыс» ЖШС), сондай-ақ Сәтпаев атындағы №19 мектеп (бұған қатысты жанжал болды) пайдалануға берілді. «ҚазЕуроСтрой» ЖШС құрылысшылары 2023 жылы жұмысқа кірісті. Бірақ неге екені белгісіз, алты айлық мерзім оларға жеткіліксіз болып, нәтижесінде оқушылар 14 қазанда ғана мектепке оралды.

«Жөндеу жұмыстарының мерзімі мен сапасының бұзылуына байланысты (келісімшарт сомасы - 446,6 млн теңге) мердігер мекеме сотқа берілді», - делінген білім басқармасы басшысының м.а. Тілекқабыл БАЙДОШЕВТЫҢ қолы қойылған хатта.

Қаладағы тағы бір мектеп – Байтұрсынов атындағы №23 мектеп осы айда оқушыларды қабылдайды. Мұнда 440,9 миллион теңгенің жөндеу жұмыстары кестеге сай жүргізілуде, деп хабарлайды әкімдік. Мердігер – «Эко Пласт» ЖШС.

Өкінішке қарай, 31 тамызда ашылуы тиіс Гагарин атындағы мектепте алғашқы қоңырау соғылмады. «Жұмыстың кеш басталуына және ауа-райының қолайсыздығына байланысты нысанды пайдалануға беру 2024 жылдың аяғына жоспарланған», - деп атап өтті облыс әкімдігінің «АЖ» сауалына берген жауабында. Мұнда жұмыс (жалпы сомасы – 1,1 млрд теңге) 79 пайызға орындалған, мердігер – «Еңбек» ЖШС.

Тағы бір миллиард теңгелік жоба – Атамбаев атындағы №8 мектеп. Қыркүйек-қазан айларында өз мектебіне оралады деп уәде етіп, бұл мектептің оқушыларын сәуір айында жақын маңдағы оқу орындарына бөлген еді. Алайда, белгіленген мерзім өтіп кетті. Бүгінде «Жалынды құрылыс» ЖШС атқарған жұмыс көлемі 74 пайызға орындалып, мектеп желтоқсан айында тапсырылады деп күтілуде. Келісімшарт сомасы - 1,3 млрд теңге.

Ал 2022 жылы күрделі жөндеуге жабылған №4 облыстық туберкулезге қарсы санаториялық мектеп-интернаты бүкіл антирекордты жаңартты. Құрылыстың ұзақ мерзімге созылып кетуіне жобалау-сметалық құжаттамада ескерілмеген, демонтаждау кезінде айқын болған жұмыстар себеп болған. Мұнда мердігер «SCS Инжиниринг» ЖШС, сома - 431,2 млн. Арнайы мектепті желтоқсан айында бітіру жоспарланған.

Енді аудандардағы көрініс туралы.

№8 мектепті уақытында тапсырмаған «Жалынды құрылыс» ЖШС тағы бір миллиард теңгелік келісімшартты – Мақат ауданы, Доссор кентіндегі Құнанбаев атындағы мектепті күрделі жөндеуді қолға алды. Бірақ мұндағы жұмыс кесте бойынша жүріп жатыр, жұмыстар келесі жылдың тамыз айында аяқталуы керек. Жалпы сомасы 1,2 млрд теңгенің жартысынан сәл азы төленген.

2025 жылы наурыз айында Құрманғазы (бұрынғы Ганюшкино) ауылындағы Құрманғазы атындағы мектепте күрделі жөндеу жұмыстарын аяқтаймыз деп уәде беріп отыр. 174,9 млн теңге бюджет қаржысын «ҚұрылысТаймКонтакт» ЖШС игеруде. Жұмыс 64 пайызға орындалып, кестеге сай жүріп жатыр.

«Ауыл – Ел бесігі» бағдарламасы бойынша Махамбет ауданы орталығындағы №2 мектеп-интернаты жөндеуден өтуде. Оқу орнын пайдалануға беру мерзімі - 2025 жылдың наурыз айы. Келісімшарт сомасы - 1,1 млрд теңге, мердігер - «Игілік-ГН» ЖШС.

Жылыой ауданындағы екі мектепті– Құлсары қаласындағы №18 орта мектепті («Гранд Мастер» ЖШС) және Қосшағыл ауылындағы №2 орта мектепті («Диана-А» ЖШС) күрделі жөндеуден кейін қабылдау жүргізілуде, бұған тиісінше 706 және 241 млн теңге жұмсалды.

Исатай ауданында да өткен жылдан бері екі мектеп: 336 млн теңгеге - Исатай орта мектебі («ГрадСтройСервис» ЖШС) және 693 млн теңгеге Аққыстау орта мектебі («Гранд Мастер» ЖШС) күрделі жөндеуден өткен. Бірінші мектепте қабылдау жұмыстары жүргізіліп жатыр, ал екіншісінде аяқталды.

Сондай-ақ білім басқармасы барлық күрделі жөндеу жұмыстары авторлық және техникалық қадағалаумен жүргізілетінін, одан кейін орындалған жұмыстардың сапа және жобалық шешімдерге сәйкестігін анықтау үшін міндетті түрде техникалық аудит жүргізілетінін хабарлады.

«Мерзімі бұзылған барлық келісімшарт бойынша мемлекеттік сатып алу туралы заңнама талаптары аясында мердігерлерге шаралар мен айыппұлдарды белгілеу үшін талап арыздар мен материалдар сот органдарына жолданды», - делінген басқарманың хатында. 

Лев ГУЗИКОВ