В Атырау
-2 
Атырауда су тасқыны кезінде шаруашылығы су астында қалған 40-тан астам шаруа өтемақы комиссиясының баяу жұмыс істеп жатқанына наразы, деп хабарлайды Orda.kz.
«Abdulla» шаруа қожалығының басшысы Нұрбек Есенқұловтың айтуынша, су тасқынынан барлық егін жойылып, шаруашылықтар бүлініп, малдар шығынға ұшыраған.
«Біз қала маңындағы Қайыршақты ауылдық округінен 40 шаруа қожалығымыз. Біз Жайық өзені, Соколок, Приморский каналдарының бойында орналасқанбыз. Су тасқыны салдарынан барлық шаруашылығымыз су астында қалды, қора-қопсымыз да, егістіктер де, тұрғын үйлер де аман қалмады, мал шығыны болды. Осы күнге дейін мемлекеттен ешқандай көмек алған жоқпыз. Аман қалған малымыз бағымсыз қалды, өйткені ешқандай қора-қопсы жоқ. Өлген мал мен егіннің шығынын өтеу үшін комиссия құрылғанын естідік, бірақ әзірге өтемақы берілген жоқ. Ал мүліктік шығынды не істейміз?» — дейдіНұрбек Есенқұлов.
Қалалық кәсіпкерлік және ауыл шаруашылығы бөлімі әкімдік тарапынан өтемақы төлеу бойынша үш комиссия құрылғанын, олардың жұмысын жалғастырып жатқанын хабарлады. Оның біріншісі – ауыл шаруашылығы саласы бойынша. 14 маусым мен 12 тамыз аралығында 60 күн бойы шаруалардан өтініш қабылдаған.
«Бүгінде бір жеміс ағашы үшін, сондай-ақ бір гектар жоңышқа немесе басқа да көшеттер үшін 15 мың теңгеге жуық төлем белгіленді. Мұны комиссия шешеді. Ал өлген малға келсек, қажетті құжаттары болса, бір малдың сол кездегі нарықтық бағасы төленеді», – дейді қалалық кәсіпкерлік және ауыл шаруашылығы бөлімі басшысының орынбасары Алтынай Ерубаева. —Екiншi комиссия - кәсiпкерлiк жөнiндегi комиссия тек жеке кәсiпкерлердiң өтiнiштерiн қарайды. Тұрғын үй-коммуналдық шаруашылық бөлімі жанынан мүліктік шығын бойынша үшінші комиссия жұмыс істейді. Бірақ төлемдер әлі басталған жоқ, өйткені кейбір жерлерде су әлі толық тартылмағандықтан, комиссиялар әлі өтініштер қабылдап жатыр.
Шаруалардың айтуынша, оларда салынған құрылыстардың 90 пайызының құжаты жоқ. Ал ережеге сәйкес, құжат болған жағдайда ғана төлем қарастырылған.
«Біз бұл мәселені қала әкіміне, оның орынбасарларына, Ауыл шаруашылығы вице-министріне көтердік. Ережеде ол қарастырылмаған болса, су тасқыны қоры болғандықтан, облыстың немесе қаланың резервтерінен төлем жасасын. Облыста барлығы 100-ге жуық шаруа қожалығы зардап шекті, сондықтан осылай жасауға әбден болады деп есептейміз. Шаруашылықтарымызға әлі жол ашылмады – малға жем-шөп беру үшін 30 шақырымның орнына 100 шақырымдай жерді айналып жүруге мәжбүрміз. Сондықтан су тасқынынан зардап шеккен Жылыой ауданы тұрғындарына біржолғы өтемақы төлеу мәселесін де қарастыруыңызды сұраймыз», - деп қосты «Abdulla» шаруа қожалығының басшысы Нұрбек Есенқұлов.
Шаруалар Атырау облысы Кәсіпкерлер палатасына жүгінді. Оның директоры Нұрлан Сүйінбаевтың айтуынша, палата өкілдері залалды өтеу жөніндегі комиссияның құрамында бар және зардап шеккен кәсіпкерлік субъектілеріне көмек көрсетеді. Бірақ төлемдер қашан төленетіні әзірге белгісіз. Бұған дейін су тасқынынан зардап шеккен кәсіпорындарға өтемақы төлеу тамыз айында аяқталады деп хабарланған болатын.