Ерлі-зайыптылар ортақ мүліктен түскен табысты қалай бөлісті

Атырау облыстық сотының азаматтық істер жөніндегі сот алқасымен талап қоюшы У.-дың К.-ге ерлі-зайыптылардың ортақ мүлкінен 1 350 000 теңге мөлшерінде табыс сомасын өндіріп алу, ерлі-зайыптылардың ортақ мүлкінен ай сайын жалдау ақысының 50% төлеуді міндеттеу туралы талап қоюы бойынша азаматтық іс қаралды, деп хабарлайды соттың баспасөз қызметі.

Талап қою мәні

Талап қоюшы мен жауапкер 1985 жылдың 23 қазанынан бастап заңды некеде болған, неке бұзылмаған. Ортақ некеде олар Құрманғазы ауылында орналасқан тұрғын емес үй-жай салып, ол 2021 жылғы 06 қазанда ортақ бірлескен мүлік ретінде тіркелген.

2021 жылғы 26 қазанда ерлі-зайыптылардың ортақ шешімі бойынша ғимарат ай сайынғы жалдау ақысы 990 000 теңге мөлшерінде дүкенге жалға беріліп, қаражат жауапкерге келіп түседі.

Талап қоюшы сотқа жауапкерге 2023 жылдың қазан, қараша және желтоқсан айлары үшін 450 000 теңгеден кіріс сомасын, барлығы 1 350 000 теңгені өндіру, сондай-ақ ай сайын жылжымайтын бірлескен мүліктің жалдау ақысының 50% - ын төлеуді міндеттеу туралы талап арызбен жүгінді.

Бірінші сатыдағы сот шешімі

Атырау облысы Құрманғазы аудандық сотының шешімімен жауапкер К.-дан талап қоюшы У.-дың пайдасына ерлі-зайыптылардың ортақ мүлкінен 1 350 000 теңге мөлшерінде табыс сомасы өндірілді.

К. Құрманғазы ауданы Құрманғазы ауылында орналасқан бірлескен сатып алынған жылжымайтын мүлікті жалға беруден түскен соманың 50% -ын ай сайын төлеуге міндеттелді.
Жауапкер К. - дан талап қоюшының пайдасына сот шығындары өндірілді.

Апелляциялық шағым

Іс апелляцияда жауапкер К.-ның апелляциялық шағымы бойынша қаралды, ол бұл ғимарат бірнеше банктерден кәсіпкерлік қызметті жүзеге асыру үшін алынған несиелік қаражатқа салынғанын, жалдау ақысы ай сайынғы салық аударымдарын және несиелік қарыздарды өтеуге кететінін көрсетіп, сот шешімінің күшін жоюды және талап қоюдан бас тарту туралы жаңа шешім шығаруды сұрады.

Сот алқасының уәждері
Талап қоюшының К.-ны Атырау облысы Құрманғазы ауданы Құрманғазы ауылында орналасқан бірлескен сатып алынған жылжымайтын мүлікті жалға беруден алынған соманың 50 пайызын ай сайын төлеу міндеттемесі туралы талабы келесі негіздер бойынша дұрыс қанағаттандырылмаған.

Алқа отбасылық заңнамада ерлі-зайыптылар арасында бірлесіп сатып алынған мүлікті бөлу тікелей көзделген, сондықтан осы бөлімде қосымша сот актісі талап етілмейді деген қорытындыға келді.

Осылайша, сот алқасы аталған бөлігінде сот шешімін негізсіз және талапты қанағаттандырудан бас тарта отырып, күшін жоюға жатады деп санайды.

Алқа шешімі

Атырау облыстық соты сот шешімін өзгертті: К.-ны Құрманғазы ауданы Құрманғазы ауылында орналасқан бірлескен сатып алынған жылжымайтын мүлікті жалға беруден түскен соманың 50% – ын ай сайын төлеуді міндеттеу бөлігінде күші жойылды, осы бөлігінде талап қоюдан бас тарту туралы жаңа шешім шығарылды.

Жауапкер К.-ның апелляциялық шағымы ішінара қанағаттандырылды.