В Атырау +10 
Қазақстан Үкіметі Президент Қасым-Жомарт Тоқаевтың Жолдауын іске асыру жөніндегі Жалпыұлттық іс-шаралар жоспарының жобасын мақұлдады. Құжатта 12 бағыт бойынша 96 іс-шара қарастырылған. Олардың қатарында инфрақұрылымды ауқымды түрде дамыту, тұрғын үй-коммуналдық шаруашылығын жаңғырту, жалақыны арттыру, халықты әлеуметтік қолдау және жасанды интеллектіні енгізу бар.
Құжат жобасы 3 қарашада Олжас Бектеновтің төрағалығымен өткен Үкімет отырысында қаралды.
Негізгі ережелерді Премьер-министрдің орынбасары – Ұлттық экономика министрі Серік Жұманғарин таныстырды.
Жоспар Президенттің «Қазақстан жаңа тарихи кезеңде: өзекті міндеттер» атты Жолдауында қойылған міндеттерді іске асыру мақсатында әзірленген.
Жаңа жоспарда не қарастырылған?
Құжат елдің әлеуметтік-экономикалық дамуының 12 негізгі бағытын қамтиды.
Атап айтқанда, өнеркәсіп пен агроөнеркәсіптік кешенді дамыту, көлік және энергетика инфрақұрылымын жаңғырту, тұрғын үй-коммуналдық шаруашылықты жаңарту және цифрлық технологияларды енгізу жөніндегі іс-шаралар жоспарланған.
Жекелеген шаралар кәсіпкерлікті дамытуға, салық және қаржы жүйелерін жетілдіруге, мемлекеттік басқарудың тиімділігін арттыруға және халықты қолдауға бағытталған.
Жоспардағы міндеттердің қатарында жалақыны арттыру, педагогтерге түсетін әкімшілік жүктемені азайту, капитал нарығын дамыту және заңнаманы жетілдіру де бар.
Сонымен қатар құжат жасанды интеллектіні енгізуді және стратегиялық ресурстарды басқарудың жаңа тетіктерін құруды қамтиды.
Әкімдіктерге әлеуметтік нысандар салу және инфрақұрылымды жаңғырту тапсырылды
Іс-шаралардың едәуір бөлігі «Халықтық құрылыс» бағдарламасын іске асырумен байланысты болады.
Еске салайық, Президент 2027 жылды Жалпыұлттық үлкен құрылыс жылы деп жариялаған болатын.
Бағдарлама Қазақстанның барлық өңірінде азаматтық инфрақұрылымды ауқымды түрде жаңартуды көздейді.
Атап айтқанда, жолдар мен денсаулық сақтау және білім беру нысандарын салу және жөндеу, энергетикалық және коммуналдық желілерді дамыту жоспарланған.
Бұған дейін жарияланған жоспарларға сәйкес, 2029 жылдың соңына дейін «Халықтық құрылысқа» шамамен 6,5 трлн теңге қарастырылған.
Үкімет отырысында Олжас Бектенов әкімдіктерге арнайы тапсырма берді.
Өңірлік билік органдарына инфрақұрылымдық жобалардың сапалы іске асырылуын, әлеуметтік нысандардың салынуын және су ресурстарының ұтымды пайдаланылуын қамтамасыз ету тапсырылды.
Әр тармақ бойынша қаржыландыру көздері айқындалуы тиіс
Премьер-министр Үкімет макроэкономикалық тұрақтылықты сақтауға және негізгі экономикалық әрі әлеуметтік міндеттерді шешуге басымдық беруі керектігін атап өтті.
«Үкімет макроэкономикалық тұрақтылықты қамтамасыз етуге, өнеркәсіп пен агроөнеркәсіптік кешенді дамытуға, көлік және энергетика инфрақұрылымын жаңғыртуға, әлеуметтік қолдаудың тиімділігін арттыруға және мемлекеттік басқаруды жетілдіруге баса назар аударуы керек», — деді Олжас Бектенов.
Сондай-ақ ол Президент бастамаларын іске асыру үшін қажетті заң жобаларын уақтылы әзірлеуді тапсырды.
Қаржыландыру мәселесіне ерекше назар аударылады.
«Жоспардың әрбір тармағын қаржыландыру мәселелері пысықталуы тиіс. Басты міндет — барлық іс-шараны тиімді әрі белгіленген мерзімде орындау», — деді Үкімет басшысы.
Осылайша, әрбір іс-шара бойынша қаржыландыру көздері айқындалып, жауапты мемлекеттік органдар олардың орындалуын қамтамасыз етуі керек.
Құжат Президентке жолданады
Дауыс беру қорытындысы бойынша Үкімет Жалпыұлттық іс-шаралар жоспарының жобасын мақұлдады.
Ұлттық экономика министрлігіне Үкімет Аппаратымен бірлесіп, тиісті Мемлекет басшысы Жарлығының жобасын Президент Әкімшілігіне енгізу тапсырылды.
Іс-шаралардың орындалуын бақылау және үйлестіру міндеті Премьер-министрдің тиісті бағыттарға жетекшілік ететін орынбасарларына жүктеледі.