В Атырау +15.2 
Қазақстан Республикасының Конституциялық Соты отбасы заңнамасының ер адам баланың биологиялық әкесі емес екенін бастапқыда біле тұра әкелікті даулауына тыйым салатын нормаларының Конституцияға сәйкестігін тексерді.
Істің мәні «Неке (ерлі-зайыптылық) және отбасы туралы» кодекстің 51-бабы 2-тармағының 1-бөлігі, сондай-ақ Жоғарғы Соттың нормативтік қаулысы болды. Осы құжаттарға сәйкес, тіркеу сәтінде ер адам биологиялық туыстықтың жоқтығын біле тұра баланы өз атына жазуға өз еркімен келіссе, соттар әкесі туралы мәліметтерді алып тастау туралы талап-арыздарды қанағаттандырудан бас тартады.
Даудың басы
Өмірде осындай жағдайға тап болған қазақстандықтың өтініші Конституциялық Сотқа жүгінуге себеп болды. Некеде тұрған кезде ер адам біреудің баласын өз атына өз еркімен жаздырып алған. Алайда, ажырасқаннан кейін ол сот арқылы құжаттардан өзі туралы жазбаны алып тастауға тырысты.
Бірінші және апелляциялық инстанция соттары қолданыстағы заңға сүйене отырып, оның талап-арызын қанағаттандырудан бас тартты: ерік білдіру өз еркімен болған, демек, құқығы бұзылмаған.
Өтініш берушінің ұстанымы мынада: қазіргі нормалар сот арқылы қорғалу құқығын негізсіз шектейді. Оның пікірінше, неке бұзылғаннан кейін биологиялық ата-анасы емес ер адамда баланы асырау және тәрбиелеу бойынша ұзақ мерзімді міндеттемелер сақталмауы тиіс.
Конституциялық Соттың қорытынды нормативтік қаулысы жақын арада ведомствоның ресми сайтында және республикалық мерзімді басылымдарда жарияланады.