Шахтада қаза болған кеншілер жұмысқа кіру үшін несие алып, пара берген бе – министр жауап берді

Премьер-министрдің орынбасары Тамара Дүйсенова Үкіметтегі брифингте «АрселлорМитал Теміртау» АҚ Көмір департаментінің бас директоры міндетін атқарушы Вадим Басиннің айналасындағы даулы мәліметке пікір білдірді, деп хабарлайды Azattyq Ruhy.

«Адамдар жазып жатыр, өзіңіз де шахтерлердің әйелдері айтқанын естіген шығарсыз. Кеншілер шахтаға жұмысқа кіру үшін несие алған деген мәлімет бар. Ол схеманы тура осы В. Басин ойлап тапқан делінеді. Осы мәселенің түбіне жетесіздер ме? Үкімет тарапынан Антикордың тексеру жүргізуін талап етесіздер ме?» - деп сұрады журналист.

Тамара Дүйсенова оның Үкіметтік комиссияның жұмысы қорытындыланған кезде нақты белгілі болатыны айтты.

«Еңбек инспекциясы Үкіметтік комиссия құрамына кірді. Ол инспекция тәртіп бойынша міндетті түрде жұмыс жүргізеді. Бірақ В. Басин туралы ештеңе айта алмаймын.  Ол тексерулерден кейін белгілі болатын шығар», - деді вице-премьер.

Премьер-министрдің орынбасары Тамара Дүйсенова кеншілердің жалақысы қанша болғанын айтты.

«Біз (қаза тапқан кеншілердің) жалақысын «Отбасының цифрлық» картасынан қарадық. Олар 300 мың теңгеден 1 млн 600 мың теңгеге дейін еңбекақы алған. Оның ішінде жастар да бар. Жұмысқа енді тұрғандары бар. Сондықтан кеншілердің жалақысында үлкен алшақтық бар», - деді ол.

Еске салсақ, Костенко шахтасындағы 46 кеншінің өмірін жалмаған апаттан кейін Вадим Басин «АрселлорМитал Теміртау» АҚ Көмір департаментінің бас директоры міндетін атқарушы болып тағайындалған еді.