Биыл елімізде жастарға жеңілдікпен 29 млрд теңгенің шағын несиелері берілмек

Биыл елімізде жастарға 11,4 млрд теңге жеңілдікпен шағын несие берілді, деп хабарлайды Azattyq Ruhy ҚР Үкіметінің баспасөз қызметіне сілтеме жасап.

Мемлекет басшысының Қазақстан халқына Жолдауын іске асыру мақсатында «Аграрлық несие корпорациясы» АҚ арқылы жастарға жеңілдікпен шағын несие беру тетігі іске қосылған.

«Биылғы 10 тамыздағы жағдай бойынша 5,3 мыңнан астам өтінім түсіп, 3 344 жоба мақұлданды. 2 577 жобаны іске асыруға 11,4 млрд теңгеге несиелер берілді. Қалған жобалар қаржыландырылу үстінде», - делінген Үкімет хабарламасында.

Несие алушылардың басым көпшілігі – мал шаруашылығы, қызмет көрсету, сауда, өсімдік шаруашылығы және жеңіл өнеркәсіп салаларындағы жобаларды іске асырушылар.

Айта кетейік, несие 21-35 жас аралығындағы азаматтарға өз кәсібін ашу немесе оны кеңейту үшін беріледі.

Жалпы 2023 жылы 29 млрд теңге сомасына 5 796 шағын несие беру жоспарланып отыр.