«Атырау» үшін Алматыдағы «достық» голы мен тең ойын

17 мамырда Алматыдағы орталық стадионда «Қайрат» пен «Атырау» командалары арасында футболдан Қазақстан кубогының 1/4 финалының алғашқы ойыны өтті.

Кездесу қызықты өтті. Бірінші таймда алаң иелері айтарлықтай басымдықта болды. Сондықтан олардың 12-минутта соққан голы әбден заңды еді: «мұнайшылар» алаң ортасында доппен жүріп қалып, «қайраттықтар» оны қағып алды. Жуао ПАОЛО айып алаңында шабуылшы Вячеслав ШВЫРЁВҚА допты шеберлікпен беріп, ол жақын жерден қақпаға гол соқты – есеп 1:0.

Екінші таймда алаңдағы көрініс өзгерді, енді қонақтар өткір және жиі шабуыл жасады. Бұрыштан доп берілген соң 70-минутта қорғанысқа көмекке келген «Қайраттың» шабуылшысы Артур ШУШЕНАЧЕВ допты басымен соғып, алдыңғы шептен асырып жіберді (ойы солай болды), бірақ оның орнына ол өз қақпасына дәл түсті. Автогол болды. Қақпашы дәрменсіз боп қалды: мұндайды өз ойыншысынан күтпеген еді! 

Матчтың соңы «Қайраттың» қаһарлы шабуылдарына ұласты, бірақ есеп өзгерген жоқ – 1:1. Жартылай финалист 7 маусым күні «Мұнайшы» стадионында өтетін қарымта ойында анықталады.

Мұрат СҰЛТАНҒАЛИЕВ