«Біз мұндай басшымен жұмыс істеуге қорқамыз!»: «алып жүкке» қатысты оқиғаның жаңғырығы

«Атырау Жарық» АҚ-ның бір топ қызметкері мемлекеттік аудандық электр станциясының ЖЭС қызметінің басшысын жұмыстан босатуды талап етіп, басшылыққа арыз жазды. Бұл туралы жергілікті белсенді Нұрлан ЖУНАСОВ әлеуметтік желідегі парақшасында хабарлады. Қызметкерлердің айтуынша, жақында басшы бұл қызметке қайта алынған, бірақ олар бұл басшымен жұмыс істегісі келмейді. Олар өндірісте ауыр зақым алған қызметкерге қатысты жазатайым оқиға үшін ешқашан жазаланбағанына наразы, бұрынғы әріптесінің тағдырын қайталағысы келмейді.

Бұл төрт жылға жуық уақыт бұрын болған оқиға: 2019 жылдың 28 қарашасында «Атырау-Жарық» АҚ электр монтері Сағындық ҚУАНДЫҚТЫ салмағы 1200 тонна ірі көлемді жүк өтетін жолда жоғары вольтты желіні ажырату кезінде ток соққан. Жабдық «АтырауНефтеМаш» ЖШС өндірістік базасынан Қарабатанда салынып жатқан газ-химия кешеніне тасымалданған еді. Бұл Атырау-Доссор трассасының бойындағы Бірлік ауылының маңында болған. Сағындық 3-4-дәрежелі электр күйігін алып, облыстық ауруханаға жатқызылды.

Аталған факті бойынша «Атырау Жарық» АҚ-ның бірнеше қызметкеріне қатысты ҚР Қылмыстық кодексінің 156-бабы («Еңбекті қорғау қағидаларын бұзу») бойынша қылмыстық іс қозғалды. Іс сотқа дейін жетті. «АтырауЖарық» мекемесінің төрт қызметкері: бас инженер, аға шебер және тағы екі шебер кінәлі деп танылды. Алайда, 2020 жылы жәбірленушінің арызы негізінде кінәлілерді қылмыстық жауапкершіліктен босату және тараптардың татуласуына байланысты қылмыстық істі тоқтату туралы шешім қабылданған. Жәбірленушіге моральдық және материалдық шығынды өтеу ретінде 2 миллион теңге төленді. Зақымдану салдарынан екі қолға жасалған операция құны да шамамен осы сомада. Саусақтары бүгілмеді, қол терісі сезбейтін болды. Өзі емделіп жатқан Алматыдағы А.Н. Сызғанов атындағы Ұлттық ғылыми хирургия орталығының дәрігерлері оны қалпына келтіру үшін екі қолға әрқайсысына 1 миллион теңге тұратын ота жасау керек екенін айтты.

Сол кезде оған ІІ-топ мүгедектігі тағайындалды. Бірақ кейін Сағындықтың заңды өкілі Сәндібек ТІЛЕУМҰХАНОВ өзіне-өзі қызмет көрсету критерийлері бойынша оның жағдайын негіздей отырып, І-топқа жататынын дәлелдеді.

Осы уақыт бойы С.Тілеумұханов сотта Сағындықтың мүддесін қорғады. Жақында одан Сағындықтың әлі де өз-өзіне толыққанды қызмет көрсете алмайтынын, бөгденің көмегін қажет ететінін білдік.

Сонымен қатар, Сағындық Қуандықтың құжатының жалғандығын бұған дейін жазған болатынбыз. Оның 3-ші рұқсат тобы болған - бұл оған «кернеуі 1000 вольт кернеуге дейінгі электр қондырғыларында жұмыс істеуге рұқсат етілгенін» білдіреді. Оның электр жабдықтарын жөндеу және қызмет көрсету сертификатында осылай көрсетілген. Бірақ, бар бәле - оның кернеуі 6000 (!) вольт болатын учаскеге жіберілуінде. Сағындықтың әкесінің айтуынша, баласы бұл желіде 6000 вольт бар екенін облыстық аурухананың жансақтау бөлімінде есін жиған соң ғана білген. Ең бастысы, төтенше жағдайдан кейін біреу оның куәлігіне қолмен өзгерту енгізген: «1000 вольтқа дейін» деген сөздер «1000 вольттан жоғары» деп түзетіліпті.

Осыдан кейін полицейлер ҚР Қылмыстық кодексінің 385-бабы («Құжаттарды қолдан жасау») бойынша тағы бір қылмыстық іс қозғады. Сағындықтың куәлігінің алғашқы сот-медициналық сараптамасы жалған екенін анықтаса, екінші сараптама оны нақты кім жасағанын анықтай алмады. Осыған байланысты іс қысқартылды.

Тағы бір жағдай бар. С.Тілеумұхановтың айтуынша, Атырау облысы бойынша мемлекеттік еңбек инспекциясы басқармасының комиссиясы шешім шығарып, соған сәйкес оқиғаға кінәлі дәрежесі жәбірленушіде 20 пайыз, «Атырау Жарық» АҚ-да 80 пайызды құрап отыр. Тілеумұханов жазатайым оқиғаға Сағындықтың еш кінәсі жоқ деп есептейді және комиссия шешіміне сотқа шағымданбақшы.

Бір топ қызметкердің ескі-жаңа басшымен жұмыс істегілері келмейтіні туралы шағымдарына қатысты түсініктеме алу үшін «Атырау Жарық» АҚ баспасөз қызметіне жүгінген едік. Біз «бүгінгі таңда «Атырау Жарық» АҚ президенті Ғұбашев Мейірбек Уахитұлы қызметтік тексеру жүргізу үшін комиссия құру туралы бұйрық шығарды, оның қорытындысы бойынша қызметкерлердің шағымына баға беріледі” деген жауап алдық.

Айнұр САПАРОВА

Белсенді Нұрлан Жунасовтың Instagram желісінен алынған сурет