2023 жылы Атырауда 2500-ге жуық бизнес-жоба қаржыландырылады

Бұл туралы Кәсіпкерлік және туризм басқармасының басшысы Нұрбол ЖАҢАБЕКОВ мәлім етті, деп хабарлайды Өңірлік коммуникациялар қызметі. Бүгінде облыста жұмыс істеп тұрған шағын және орта кәсіпкерлік субъектілерінің саны - 65 396 (бұл көрсеткіш өткен жылы 52869 болған).

2021-2025 жылдарға арналған кәсіпкерлікті дамыту Ұлттық жобасы шеңберінде өткен жылы бюджеттен 8 млрд теңге бөлінген. Оның ішінде несиенің пайыздық мөлшерлемесін субсидиялауға - 6 млрд теңге, несиені кепілдендіруге - 1,9 млрд теңге, мемлекеттік гранттар ұсынуға - 106 млн теңге қарастырылған. 

- Облысымызда іскерлік ахуалды жақсарту және кәсіпкерлікті дамыту мақсатында өңірде бірнеше мемлекеттік және жергілікті бағдарламалар жүзеге асырылып жатыр. Нәтижесінде шағын және орта кәсіпкерліктің маңызды көрсеткіштерінде өсім динамикасы байқалып отыр, - деді Н.Жаңабеков. Оның айтуынша, осы жылы кәсіпкерлерді қаржылық қолдау аясында бюджеттен 10,5 млрд теңге бөлініп, кәсіпкерлердің 2500-ге жуық жобасын қаржыландыру жоспарлануда.

Дайындаған Ләззат ҚАРАЖАНОВА

ӨКҚ жолдаған сурет