В Атырау
+1 
Таңдай ауылына ауылішілік жол салу құрылысы басталады. 30 наурызда облыс әкімі Серік ШӘПКЕНОВ Махамбет ауданы Бақсай ауылдық округі Таңдай ауылының тұрғындарымен кездесті.
Алдымен облыс әкімі Бақсай ауылдық округінде атқарылып жатқан жұмыстар туралы баяндама жасап, кейін ауыл тұрғындарының ұсыныс-тілектерін тыңдады. Таңдай ауылында ауылішілік жол салу мәселесі өзекті болып отыр.
- Бұл көптен көтеріліп келе жатқан мәселе. Таңдай ауылында 6 шақырым жаяу жүргіншілер жолы бар ауылішілік жолдарды күрделі жөндеу жұмыстары осы жылы басталады. Мердігер мекеме - «ИгілікСтройСервис» ЖШС. Бұл істердің бәрі жергілікті тұрғындардың игілігі үшін салынады. Сондықтан басталған құрылыс жұмыстары сапалы аяқталуы үшін ауыл белсенділері қоғамдық бақылауды күшейтуі қажет,- деді С.Шәпкенов.
Кездесуде тұрғындар таза ауыз сумен қамту, ауылішілік автожолын, балалар ойын алаңын, спорт кешенін және кәріз суын төгетін алаң салу, жұмыспен қамту, ауыл ішіндегі карьерді ауыл сыртына көшіру секілді әлеуметтік мәселелерді көтерді. Серік Шәпкенов жиында көтерілген сұрақтар заң шеңберінде кезең-кезеңімен шешілетінін айтты. Бақсай ауылдық округінде 2 761 адам тұрады. Мұнда 1 мектеп, 1 бөбекжай, 1 дәрігерлік амбулатория және өзге де әлеуметтік нысандар бар. Серік Шәпкеновтің Бақсай ауылдық округінің тұрғындарымен кездесуі Махамбет ауданы әкімдігінің Facebook, Instagram желісіндегі ресми парақшасында тікелей эфирде көрсетілді.
Ләззат ҚАРАЖАНОВА
ӨКҚ жолдаған суреттер