Атырауда қала маңында қамыс өртенді

Облыстық төтенше жағдайлар департаменті қоғаммен байланыс тобының мәліметінше, қамыс өрті кеше, 23 наурызда болған.

«Атырау қаласындағы Шәкіров көшесі тұсында Перетаска каналының жағалауы өртенді. Бұл туралы жергілікті уақытпен сағат 12:51-де шақырту түсті. Канал бойындағы қамыс өрті сол маңдағы саяжай учаскелерін шарпыды. Өрттің салдарынан 1 жазғы тұрғын үй мен ауласындағы шаруашылық сарай, тауық қора, жылыжай бөліктері бүлінді. Канал жағалауында жалын шарпыған қамыстың аумағы – 1,5 гектар», - деп хабарлады департаменттің қоғаммен байланыс тобы.

Қамыс өрті сағат 15:04-те оқшауланып, сағат 15:37-де толық сөндірілді. Өрттен зардап шеккендер мен қаза тапқандар жоқ.

«Алдын ала болжамға сәйкес саяжай учаскесінде қоқысты жағу кезінде өрт қауіпсіздігі ережелері сақталмаған. Соның салдарынан өрт тұтанған», - деп мәлім етті департаменттің қоғаммен байланыс тобы.

Жалынды сөндіруге 53 қызметкер мен 12 техника жұмылдырылған.

Еске сала кетелік, бұған дейін Атырауда канал жағасындағы 3 гектар аумақта қамыс өртенгенін хабарлаған болатынбыз.

«Атырау қаласының маңындағы Новокирпичный елді мекенінде орналасқан каналдың жағасында қамыс өртенді. Жалынды сөндіруге өрт сөндіру және авариялық-құтқару жедел қызметінің 9 қызметкері мен 3 арнайы техника тартылды. Өрт сөндірушілер оқиға орнына жеткен кезде «Атақоныс» шаруа қожалығының аумағында далалық шөптің жанып жатқаны анықталды. Қамыс өрті 3 гектар аумаққа жайылған», - деп хабарлаған еді департаменттің қоғаммен байланыс тобы.