Атырауға ұшқан тікұшақ қатты екпінмен қонып, 4 адам қаза тапты

Атырау – Орал – Атырау бағыты бойынша «Қазтрансойл» АҚ тапсырысы бойынша құбырды шолған тікұшақтың қатты екпінмен қонуы нәтижесінде төрт адам қаза тауып, екеуі жарақат алды, - деп хабарлайды Азаматтық авиация комитеті.

«Соңғы мәліметтерге сәйкес, тікұшаққа Төтенше жағдайлар министрлігінің іздестіру тобы жетті. 4 адам қаза тауып, 2 адам жарақат алған.

ҚР ИИДМ Азаматтық авиация комитеті тікұшақтың екпінмен қонуы нәтижесінде қаза тапқан азаматтардың туған-туыстары мен жақындарына көңіл айтады», - делінген хабарламада.

23 ақпанда сағат 15:38-де Орал қаласынан 6 шақырым жерде, Батыс Қазақстан облысы Бәйтерек ауданындағы Чапурино кентінің ашық аумағында Атырау – Орал – Атырау бағыты бойынша «Қазтрансойл» АҚ тапсырысы бойынша құбырды шолып жүрген ТЖМ Қазавиақұтқару тікұшағы қатты екпінмен қонған.

Бортта  5 экипаж мүшесі және 1 жолаушы болғаны хабарланды.