​Қоян жылы сәттілік әкелсін!

Қоян жылы қарсаңында «АЖ» тілшісі Атырауда сәндік қоянға сұраныс қаншалықты артқанын сұрастыруды жөн көрді. Ірі зоодүкендердің өкілдері қала тұрғындарының бұл сүйкімді жануарды сыйлыққа немесе үй жануары ретінде сатып алуға әзірге асықпайтынын айтты. Дегенмен, соңғы Қоян жылы қарсаңында, яғни 2010 жылдың аяғында сұраныс жақсы болғанын еске алды.

Бұл ретте «Чампино» зоодүкенінің иесі Денис ТАРАСОВ 31 желтоқсан күні кешке қояндарды талап алып кететініне сенімді:

– Жыл сайын 31 желтоқсанда атыраулықтар күнделікті шаруаларынан кейін үй қоянын, тотықұс, аламан сатып алуға келеді. Бұл жыл сайын қайталанады. Көп адам балаларына қоян сатып алады, көбіне жігіттер оны құрбыларына тарту етеді, - дейді Тарасов.

Тарасов 2011 жылы Қоян жылы қарсаңында осы жануарлардың 30-ын сатқанын еске алды.

Ал «Лапа» үй жануарлары дүкенінің аға менеджері Аленаның айтуынша, оларда сұраныс қараша айында шарықтап, 6 үй қояны сатылған.

Атырауда салпаңқұлақ, қысқа құлақ және тапалтақ тұқымды сәндік қояндар сатылады. Салпаңқұлақ және қысқақұлақтылары 10 мың теңге, ал тапалтақтары қымбатырақ, 18 мың теңге.

Бір қызығы, Денис Тарасовтың өзі ауласында сәндік қоян өсіреді. Қазір оның бес ұрғашы және бір еркек қояны бар. Дүкенде тағы төртеуі бар. Тіпті олардың біреуін туған күніме сыйлық ретінде алғым келді. Қоңыр жануар жұмсақ ойыншыққа ұқсайды, оның сабырлы, мойынсұнғыш екенін байқауға болады. Ол Алматыдан сатып алынған екен.

Мамандығы бойынша инженер-құрылысшы Тарасов Атырауда тұрғын үй кешендерін салған, содан кейін әйелі оның ұсақ жануарларға күтім жасауға деген құмарлығын оятқан. Олар өздерінің зоодүкенін ашып, бірте-бірте кеңейтті. Жануарларға күтім жасау айтарлықтай физикалық және моральдық күшті қажет етеді, сондықтан оған негізгі жұмысын тастап, отбасылық кәсіппен айналысуға тура келген.

Денис үй жануарларын жазда өз ауласында өсіретін жоңышқамен қоректендіреді. Қысқа дайындап кептіреді, жем әзірлейді. Сонымен қатар, дәнмен қоректендіріп, қажетті дәрумендер береді.

Жануарды алғаннан кейін, оны бір аптадан соң кері қайтаратын жағдайлар кездеседі екен. Өйткені арнап сатып алғаннан кейін баланың қызығушылығы басылып қалатын көрінеді.

- Мұндай жағдайлар көп емес, бірақ болды. Далаға лақтырмай, сатушыға қайтарғаны жақсы. Жануарды әлсіз күйде қайтарады, біз оны емдейміз, бір апта карантинде ұстаймыз, ветеринарларға жүгінеміз, былайша айтқанда, біз оны оңалтамыз, - дейді Тарасов. - Сондықтан қоянды саналы түрде сатып алған дұрыс, оның күтіміне жауапкершілікпен қарауға дайын болу керек және албырттықпен сатып алмау керек. Өйткені, бұл жай ғана жұмсақ ойыншық емес, балалармен қоса ересектерге де жақсы әсер ететін тірі жаратылыс.

Жаңа жыл құтты болсын!

Айнұр САПАРОВА

Суреттерді түсірген автор