Аққыстау ауылында электр тарату желілері жаңартылды

Аққыстау ауылы АТП ықшам ауданы тұрғындарының көп уақыттан бері қозғап жүрген тоқ желісінің мәселесі шешімін тапты, деп хабарлайды Исатай ауданы әкімдігінің баспасөз қызметі.

АТП мөлтек ауданындағы ток желілер 1975 жылдары орнатылған. Содан бері бағаналар, желілері жаңартылмауына байланысты ауа райының қолайсыз күндері жарық жиі өшіп тұрған. Осы мәселені шешу мақсатында өткен жылы жобалық-сметалық құжаттама дайындалып, осы жылдың тамыз айында басталған жұмыстар, қараша айында аяқталды.

- Жаңартылған ток желілерінің ұзындығы 4 шақырымға жуық. Жұмыстар Нарын, Б.Нсанбаев, Келте Нарын, Х.Ерғалиев, Е.Қазақстан, С.Сейфуллин көшелерін қамтыды. Жоба аясында С.Сейфуллин көшесіндегі ескі трансформатор алынып, жаңадан 160 кВт трансформатор орнатылды. 103 дана бетон бағаналар қондырылып, 5 мың метр СИП кабельдер тартылды. Электр желісін жаңарту барысында әр тұрғынның үйіне ток желісі мердігер мекеме арқылы жүргізілді, - деді аудандық Құрылыс бөлімнің басшысы Жұмажан СЫДИХОВ.

Оның айтуынша, бұл жұмыстармен қоса Б.Нысанбаев 1 және 2 көшелеріне электр желісі тартылып, көше жарық шамдары орнатылған. Аудан бойынша электр желілерін жаңарту бағытында жұмыстар жалғасын табады. Айта кетейік, Исатай ауданының Аққыстау ауылдық округінде 10592 тұрғын бар.

Ләззат ҚАРАЖАНОВА

ӨКҚ жолдаған суреттер