В Атырау
-1 
Бүгін, 23 тамызда Атырау облысы әкімінің бұрынғы бірінші орынбасары, колония-қонысқа 10 жылға сотталған Нұрлан ТАУБАЕВ тағы да сот залына келмеді. Кеше, 22 тамызда отырыс түскі үзіліске дейін ғана жалғасып, түстен кейін Таубаевтың келмеуіне байланысты өтпеді.
Кейін белгілі болғандай, оның қан қысымы кенет көтеріліп, сот отырысы бүгінге шегерілгенімен, бұл жолы да сотталушы Таубаев келмеді.
Еске салсақ, облыстық сот Нұрлан Таубаевтың апелляциялық шағымын қарап жатыр.
Сот отырысы белгіленген уақыттан бір сағат өткен соң басталды. Облыстық соттың қылмыстық істер жөніндегі сот алқасының төрағасы Раиса АҚҚҰЛОВА қарауылдардың бірінші сот сатысындағы іс бойынша өткен құрылыс басқармасының сотталған бұрынғы басшысы Тимур БАСАРОВТЫ да залға әкелмегенін атап өтті. Ол қазіргі уақытта сот отырысына адвокаттарының келмеуіне байланысты Таубаевтың тергеу изоляторынан шығудан бас тартқаны туралы қарауылдар жасаған актіні мәлімдеді.
Бұдан басқа, Р.Аққұлова Таубаевтың қан қысымы қалыпты екені және сот процесіне қатыса алатыны туралы медициналық анықтама түскенін айтты.
Одан кейін сот алқасы Таубаевтың адвокаттары Игорь ВРАНЧЕВ, Нұрлан ЖОЛБОЛОВ және Нұртас АМАНБАЕВТЫҢ келмеуін сот отырысының бұзылуына әкелген сотты құрметтемеушілік деп бағалады.
Соған қарамастан сот алқасының төрағасы келмеген адвокаттардың өтініштерін қарады. Олар өз өтініштерінде басқа істер бойынша жұмыстың көптігіне байланысты сотты 27 немесе 29 тамызға шегеруді сұраған.
Адвокат Аманбаев та Таубаевқа қатысты бұлтартпау шарасын өзгертуді сұрап, оның операциядан кейін күтім көрмегенін, тергеу изоляторында бұған жағдайдың жоқтығын алға тартты. Сондай-ақ ол Таубаевтың созылмалы ауруларының асқынып кеткенін атап өтті.
Содан кейін айтылған өтініштер бойынша тараптардың пікірлері тыңдалды. Кездесуге онлайн қосылған төртінші адвокат Руслан САҒЫМБАЕВ әріптестерін қолдады. Бірақ сотқа басқа қатысушылардың пікірін тыңдау барысында ол төрағадан шұғыл мәлімдеме жасауға мүмкіндік беруін сұрады. Сөйтіп ол күтпеген жерден өзінің енді Таубаевтың адвокаты емес екенін мәлімдеді. Өйткені Таубаев оның қызметінен бас тартқан. Осыдан кейін Сағымбаев байланыстан ажыратылды.
Бұдан кейін сот алқасы адвокаттардың процесті кейінге қалдыру туралы өтініштерін қабылдамады. Раиса Аққұлова сот олардың әрекетін сот отырысын бұзу ретінде бағалайтынын тағы да атап өтті.
- Адвокаттарға осы процеске қатысу үшін кестелерін реттеуге өтініш жасалып, шақырылды. Алқа адвокаттардың әрекетін сотқа құрметтемеушілік және процесті созу деп бағалайды, - деді Р.Аққұлова.
Таубаевқа қатысты бұлтартпау шарасын өзгерту туралы мәселені шешу үшін сот үзіліс жариялап, кеңесу бөлмесіне кетті.
Айнұр САПАРОВА