Тыйым салынғанына қарамастан, күйеуі әйелін ұруға құмар

Атырауда жыл басынан бері 102 операторына тұрмыстық зорлық-зомбылыққа қатысты 2345 хабарлама келіп түсіп, 805 қорғау нұсқамасы шығарылды.

ҚР ӘҚБтК-нің 73- бабы бойынша отбасы-тұрмыстық қатынастар саласындағы заңсыз әрекеттері үшін 600-ге жуық тұлға әкімшілік жауапкершілікке тартылды.

Көп жағдайда қорғау нұсқамасы шығарылып, аталған құжаттың талаптарын бұзған 52 құқық бұзушы жауапкершілікке тартылған. Қорғау нұсқамасын орындамаған тағы 189 тәртіп бұзушыға сот «мінез-құлқына ерекше талаптар» белгіледі. Тұрмыстық зорлық-зомбылық көрген 10 әйел мен 23 бала уақытша дағдарыс орталығын паналады.

Отбасындағы жанжалдың соңы татуласуға ұласпай жататынын түсінген полицейлер тұрмыстық зорлық-зомбылық фактілеріне мән бере бастаған сыңайлы. Жақында ғана Атырау қаласы полиция басқармасының төрт қызметкері сотталған еді. Учаскелік инспекторлар К. мен А. ҚР Қылмыстық кодексінің 370-бабының 4-бөлігі («Ауыр зардаптарға әкеп соққан қызметтегі әрекетсіздік») бойынша 4 жылға бас бостандығынан айырылды, ал жедел уәкіл Т. мен тергеуші Л. ҚР ҚК-нің 433-бабының 3-бөлігінің 2-тармағы («Адамдар тобының алдын ала сөз байласуы бойынша ауыр қылмысты жасыру») бойынша тиісінше 4 және 3 жыл жаза алды.

Өйткені, олардың әрекетсіздігінен үш баланың анасы зардап шегіп, оны қорлаған адам қайтыс болды. Қылмыскер оны ұрып-соғып, зорлағаны үшін әйел бірнеше рет полицияға жүгінген. Бірақ ол бостандықта жүре берген. Мұның бәрі оның тағы да әйелдің пәтеріне кіріп, әйелдің басынан ауыр затпен ұрып, дәретханаға кіріп, асылып қалуына әкелді.

Полиция қызметкерлері тұрмыстық зорлық-зомбылықтың құрбаны немесе куәгері  102, +7 (778) 932-93-92, +7 (702) 235-19-98 немесе 98-35-32 сенім телефоны арқылы құқық қорғау органдарының қызметкерлерінен кеңес ала алатынын хабарлайды.

Дайындаған Зульфия ИСКАЛИЕВА