Ата-аналар пикеті: «Мектептің жері қайтарылсын»

1 маусымда №1 Жұмабаев (бұрынғы Ленин) атындағы мектеп оқушылары ата-аналарының бастамашыл тобының өкілі Қайша РЫСПАЕВА облыстық әкімдік ғимаратының жанында 1993 жылы тартып алынған жерді оқу орнына қайтаруды талап етіп, жалғызкісілік пикет өткізді.

5 жылдан бері бұл мектептің оқушылары басқа оқу орнында оқуға мәжбүр.

Жаңа ғимараттың жобалық-сметалық құжаттамасын дайындап, бекітуге бірнеше жыл уақыт кетті, кейін ата-аналар жобамен келіспеді. Олар 160 орынның, яғни екі ауысымдағы бар болғаны 320 баланың тұрғындар тығыз қоныстанған аудан үшін өте аз екеніне сенімді. Биліктің мектептің шағын болғаны, жалпы қазір үлкендеу ғимарат салуға мүмкіндік жоқ деген уәжіне төңіректегі тұрғындар олай еместігіне дәлелдер келтірді. Облыстық мұрағатта оларға «Ленин атындағы орта мектептің оқу жылының бірінші жартыжылдығы қорытындылары туралы» мұрағат үзіндісі берілді.

Онда 1949-1950 оқу жылында мектепте 610 бала білім алғаны көрсетілген. Ғимарат апатты деп танылғанға дейін олардың саны шамамен осындай болған. Тұрғындар саны үнемі өсуде, ал ауданда балалар саны көбейіп жатыр. Енді билік оларға жаңа жоба ұсынып отыр, соған сәйкес Жұмыскерде Ғани Мұратбаев атындағы мектеп салынды. Бірақ сол мектептің аумағы 152 сотық, ал Жұмабаев атындағы мектеп аумағы ресми түрде небәрі 90 сотық деп жазылған, ал шын мәнінде 75 сотық. Ата-аналардың өздері бұл жобаны сәтсіз деп санайды және Х.Доспанов атындағы №1 мектептің үлгісі бойынша жаңа ғимарат салуды сұрайды. Бірақ билік бұл мүмкін емес, ол үшін 129 гектар аумақ қажет дейді.

Неліктен 152 сотық жерге мектеп салу қалыпты, ал 129 сотық жерге мүмкін емес екені мүлдем түсініксіз. Қалай болғанда да, ата-аналар мектепке тиесілі жерді қайтаруды талап етіп отыр. Орталық кіреберіс жақтағы қорғау аймағының бір бөлігі бұрын ағылшын мектебі орналасқан ғимарат пен бизнес орталығына өтіп кеткен, ал артқы жағында кезінде қаржы полициясы тұрақ ұйымдастырған. Егер бұл учаскелер мектепке қайтарылса, онда олар қалаған жоба осы жерге жақсы «сыйып кетеді».

– №18 мектептің ғимараты үш қабатты, 34 сотық жерді алып жатыр, ал Ғани Мұратбаев мектебі екі қабатты – 57 сотық. Әрине, біз үшін бірінші нұсқа тиімді, - дейді Қ.Рыспаева. – Кімнің қабылдауында болмадық, Атырау облысынан сайланған сенатор Дүйсенбай ТҰРҒАНОВҚА да жүгіндік. Енді тек облыс әкімі қалды.

Сол күні Қайша Рыспаева онымен ақыры кездесе алмады, оны Атырау облыстық ішкі саясат басқармасының басшысы Қанат ӘЗМҰХАНОВ қабылдады. Ол әкіммен кездесу келесі аптада болады деп уәде берді.

Зульфия ИСКАЛИЕВА