Атырау облысының прокуратурасында Өңірлік кәсіпкерлер палатасының басшылығымен кездесу өтті. Мұнда қордаланып қалған мәселелер талқыланды.
Мысалы, жергілікті билік құрылыс жұмыстарын бастау үшін табысталатын сәулет-жоспарлау тапсырмасы мен техникалық шарттарды бекітуден негізсіз бас тартылған, мемлекеттік мүлікті жалға беру кезінде заңсыз құны өсірілген, қала аумағындағы жолаушыларды тасымалдаумен айналысатын кәсіпкерлер халықтың әлеуметтік осал топтарын тегін тасымалдауға міндеттелген, көрсетілген қызмет үшін ақы төленбеген.
Облыс прокуроры Халидолла ДӘУЕШОВ хабарлағандай, мобильді топтар хабарламаларға дереу шара қолдануда. Прокурорлық қадағалау шараларымен тиісті мемлекеттік мекемелердің басшылары әкімшілік жауапкершілікке тартылды.
- Бүгінде мобильді топтардың сенім телефондарына 46 хабарлама түсті, 272 заңсыз тексеру тоқтатылып, 2 әкімшілік хаттама заңсыз деп танылылды, - деп мәлімдеді қадағалау органының басшысы.
Кездесу қорытындысы бойынша билік органдары мен кәсіпкерлік арасындағы ынтымақтастықты жақсарту бойынша тиісті ұсынымдар берілді.
Дайындаған Ләззат ҚАРАЖАНОВА