Соңғы жылдары ерлі-зайыптылардың көпшілігі балалы болу үшін экстракорпоралды ұрықтандыру (ЭКҰ) әдісіне жүгінеді. Бұл облыстық әйелдер істері және отбасылық-демографиялық саясат жөніндегі комиссия отырысында басты тақырыпқа айналды.
Денсаулық сақтау басқармасының басшысы Асхан БАЙДУВАЛИЕВТІҢ айтуынша, жыл басынан бері 117 әйел ЭКҰ-ға арналған комиссиядан өтіп, оның 98-і осы процедураға жолдама алған. Бүгінде 9 әйел құрсағында бала көтеріп жүр.
– ЭКҰ квотасына ресми некеде тұрғандар да, ресми некеде тұрмаған жұптар да өтініш бере алатынын ескертемін. Пациенттердің жасы 18-ден 42-ге дейін болуы және олардың елімізде тұрғылықты жері бойынша тұрақты тіркелген болуы қажет, – деді А.Байдувалиев.
Отырыс нәтижесінде баласыз отбасылардың балалы болуына мемлекеттік қолдау көрсету, жанұялардың әл-ауқатын үнемі бақылауда ұстау, отбасы тәрбиесін жетілдіру бойынша тиісті мемлекеттік органдарға ұсыныс жолданды.
Дайындаған Айнұр САПАРОВА