Атыраулық полицейлер қажылыққа бара жатқан өзбекстандық велосипедшіге қол ұшын берді

56 жастағы Өзбекстан азаматы Бозорбой Сатволдиев Сауд Арабиясындағы Мекке-Мединеге қажылыққа велосипедпен бара жатыр. Атырау облысы Жылыой ауданында полиция қызметкерлері жол бойында велосипедіне Өзбекстанның туын ілген ер адамды байқайды. 

Мән-жайды білген соң, Жылыой ауданы АПБ Тергеу бөлімшесі  бастығының орынбасары Нұрлан ЖАНГЕЛОВ ер адамға көмегін ұсынып, жол көрсетіп, азық-түлік және қаражатпен қамтамасыз еткен. Бозорбой Сатволдиев риза болып, алғысын білдірді. Айтуынша, қазақ полицейлері оған саяхат кезінде көп көмектескен:

- Ассалаумағалейкум, құрметті қазақстандықтар! Мен Өзбекстан Республикасының азаматымын. Өзбекстаннан Меккеге велосипедпен қажылыққа бара жатырмын. Жол көрсетіп, құрмет көрсетіп жатқан Қазақстан полициясына рахметімді айтамын, қызметтеріңізге сәттілік! 

Дайындаған Айнұр САПАРОВА

ПД ұсынған сурет