Атырау, 3 шілде 07:24
 бұлыңғыр боладыВ Атырау +19
$ 466.44
€ 487.71
₽ 8.56

«Елбасының отбасы өмір бойы азаматтардың салықтары есебінен өмір сүреді»: бұл жалған ақпарат

684 просмотра

Telegram-чаттарда 5 маусымда өтетін республикалық референдум барысында Нұрсұлтан Назарбаевтың отбасының барлық мүшелеріне қол сұғылмаушылыққа кепілдік беретін және азаматтардың салықтары есебінен оларды өмір бойы асырауға мүмкіндік беретін түзетулер қабылданатыны туралы ақпарат тарады. Бұл жалған, деп хабарлайды stopfake.kz.

ҚР Әділет министрлігі бұл ақпаратты жоққа шығарды.

– Тұңғыш Президент мәртебесіне қатысты Конституцияға енгізілетін түзетулер жобасына сәйкес үш норманы өзгерту ұсынылды:

1) 42-баптың 5-тармағының екінші бөлігі алып тасталады, оған сәйкес бір адам қатарынан екі реттен артық Республика Президенті болып сайлана алмайды. Бұл шектеу Қазақстан Республикасының Тұңғыш Президентіне қолданылмайды.

2) 46-баптың 4-тармағы алып тасталады. Онда Тұңғыш Президенттің мәртебесі мен өкілеттіктері Республика Конституциясымен және конституциялық заңмен айқындалатыны жазылған.

Қазіргі уақытта Тұңғыш Президенттің құқықтық мәртебесі «Қазақстан Республикасының Тұңғыш Президенті – Елбасы туралы» жеке Конституциялық заңмен реттеледі. Тұңғыш Президентке және онымен бірге тұратын отбасы мүшелеріне жеке меншік құқығымен тиесілі мүлікке қол сұғылмаушылық аталған Конституциялық заңда белгіленген.
Өз кезегінде, аталған норма Конституциядан алып тасталған жағдайда, Қазақстан Республикасының заңнамасын Конституция нормаларына сәйкес келтіру үшін осы заңды жою қажет болады.

3) Тұңғыш Президенттің аталуы Конституцияның 91-бабының 2-тармағынан алып тасталады.
Конституцияның 91-бабының 2-тармағына сәйкес Конституцияда белгiленген мемлекеттiң тәуелсіздігі, Республиканың бiртұтастығы мен аумақтық тұтастығы, оны басқару нысаны, сондай-ақ тәуелсіз Қазақстанның Негізін салушы, Қазақстан Республикасының Тұңғыш Президенті – Елбасы іргесін қалаған Республика қызметінің түбегейлі принциптері және Қазақстан Республикасының Тұңғыш Президенті – Елбасының мәртебесі өзгермейді.
Тұңғыш Президент мәртебесіне қатысты аталған ережелерді алып тастау ұсынылды.

Жоғарыда айтылғандарды қорытындылай келе, Конституцияға енгізілетін түзетулер жобасы Қазақстан Республикасының Тұңғыш Президентіне және оның отбасына жаңа кепілдіктер беруді көздемейтінін хабарлаймыз. Керісінше, Конституцияға өзгерістер енгізу туралы заң жобасында Тұңғыш Президент мәртебесіне қатысты барлық нормаларды алып тастау ұсынылды, – делінген министрліктің StopFake.kz-тің сауалына берген жауабында.

Демек, Нұрсұлтан Назарбаевтың барлық отбасы мүшелерін ел азаматтарының салықтары есебінен ұстауға кепілдік беретін түзетулер референдумға шығарылатыны туралы тараған ақпарат – фейк.

19 мамыр, 11:27

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 707 37 300 37 нөміріне және editors@azh.kz поштасына жібере аласыз.