Атырау, 29 наурыз 09:49
 ашықВ Атырау +10
$ 448.15
€ 483.46
₽ 4.86

Таубаев – 10 жыл, Басаров – 5 жыл жаза алды

Сурет Бейнежазба
1 902 просмотра

Бүгін, 17 мамырда Атырауда облыс әкімінің бұрынғы бірінші орынбасары Нұрлан ТАУБАЕВ пен құрылыс басқармасының басшысы Тимур БАСАРОВҚА қатысты сот үкімі шықты.

Сот екеуін де пара алуға әрекеттенгені үшін кінәлі деп тауып, Таубаевты 10 жылға, Басаровты 5 жылға бас бостандығынан айыру үкімін шығарды.

Олар жазасын ең төменгі қауіпсіздік мекемесінде өтейтін болады (қазір колония-қоныс осылай аталады).

Үкім заңды күшіне енген жоқ.

Сәл кейінірек Атырау облысының қылмыстық істер жөніндегі мамандандырылған ауданаралық сотының баспасөз қызметі хабарлама таратты: «Атырау облысының қылмыстық істер жөніндегі мамандандырылған ауданаралық соты Атырау облысы әкімінің орынбасары Т.-ны және Атырау облысы құрылыс басқармасының басшысы Б.-ны айыптау бойынша қылмыстық істі қарады.

Сотпен анықталғаны 

2020 жылдың шілде айында Атырау облысының әкімдігімен Жылыой ауданының Құлсары қаласында аурухана салу туралы шешім қабылданды. Құрылыс жұмыстарын " БКК " ЖШС-гі орындаған. Сотталушы Т. облыс әкімінің орынбасары бола тұра және құрылыс саласына жетекшілік ете отырып, "БКК" ЖШС-нің директорының орынбасарынан келісімшарт сомасының 10% мөлшерінде пара талап еткен. Кейін сотталушы Б.-ның (құрылыс басқармасының басшысы) қатысуымен пара сомасы 7% - 185 500 000 теңге мөлшерінде келісілген. Т. сотталушы Б.-ға ақша қаражатын алып келуді тапсырған. 

Содан кейін Б. жәбірленушіден 185 730 004 теңге (423 900 АҚШ доллары және 5 000 000 теңге) мөлшерінде пара алған. Пара беру барысында Б. сыбайлас жемқорлыққа қарсы Агенттіктің қызметкерлерімен ұсталған. Көрсетілген мән-жайлар мен сотталушылардың кінәсі сотталушы Б.- ның кінәсін толық мойындау жауабымен, жәбірленушінің, куәлардың айғақтарымен, оқиға болған жерді қарау хаттамаларымен, жеке тінтумен, "Whats app" мессенджеріндегі хат алмасумен, бақылау камераларының бейнежазбасымен, АЖІШ және ЖТӘ нәтижелерімен, сараптама қорытындыларымен өз дәлелін тапты. 

Соттың позициясы 

Сот сотталушы Т.-ны ҚК-тің 24-бабының 3-бөлігі, 366-бабының 4-бөлігімен (мемлекеттік қызметті атқаратын лауазымды адамның қорқытып алу жолымен адамдар тобының алдын ала сөз байласуымен аса ірі мөлшерде пара алуға оқталуы), Б.-ны ҚК-тің 28-бабының 5-бөлігі, 24-бабының 3-бөлігі, 366-бабының 4-бөлігімен (аталған іс-әрекеттерге көмектесу) кінәлі деп таныды.  Сот сотталушы Т.-ның қабылдаған антты бұзу арқылы қылмыс жасағанын жазаны ауырлататын жағдай деп таныды. 

Қылмыс жасалған уақытта қолданылған ҚК-нің 366-бабының 4-бөлігінің санкциясы 10 жылдан 15 жылға дейінгі мерзімге бас бостандығынан айыру түріндегі жазаны көздейді. Заң бойынша (ҚК-нің 56-бабы 3-бөлігі) қылмысқа оқталу кезінде жаза ең жоғарғы жазаның ¾ бөлігінен, яғни 11 жыл 3 айдан аспауға тиіс. Сот үкімімен Т.-ға 10 (он) жыл бас бостандығынан айыру жазасы тағайындалды.

Сотталушы Б.-ға жазаны ауырлататын мән-жайлар мен заң талаптарының (жаза 8 жыл 5 айдан аспайды) болмауы ескеріле отырып, ҚК-тің 55-бабының 4-бөлігі қолданылып, 5 жыл бас бостандығынан айыру жазасы тағайындалды. Екі сотталушы да өмір бойы мемлекеттік қызметте жұмыс істеу құқығынан айырылды. 

Сот үкімі заңды күшіне енген жоқ. 

Айнұр САПАРОВА

17 мамыр 2022, 12:17

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.