Украинадағы соғыс: 47-күн

Украинадағы соғыс жайлы барлық ақпарат Азаттық радиосынан алынды.

Вашингтон Үндістанмен Украинадағы соғысты талқылайды

АҚШ президенті Джо Байден бүгін, 11 сәуір күні Үндістан премьер-министрі Нарендра Модимен видео конференция арқылы сөйлесіп, Ресейдің Украинадағы басқыншылық соғысы мен оның ғаламдық экономикаға салдарын талқыламақ. Бұл туралы Ақ үй хабарлады.

Reuters агенттігінің жазуынша, АҚШ Үндістанның Ресей энергетикасын импорттауды күшейткенін қаламайтынын ашық білдірмек. Ресей Украинаға басып кіргелі Үндістан Ресейден кемі 13 миллион баррель мұнай сатып алған. Батыс Ресейге қарсы санкцияларын күшейткен тұста Ресей Үндістанға мұнайын жеңілдікпен сатқан.

Reuters агенттігінің дерегінше, былтыр Үндістан 16 миллион баррель мұнай сатып алған.

The Times: Финляндия мен Швеция НАТО құрамына осы жазда кіруі мүмкін

Финляндия мен Швеция НАТО мүшелегіне осы жазда-ақ өтуі ықтимал. Бұл туралы АҚШ-тағы ресми тұлғаларға сілтей отырып The Times басылымы хабарлады.

Вашингтондағы дереккөздеріне сілтеген басылымның жазуынша, өткен аптада НАТО-ға мүше елдердің сыртқы министрлері қатысқан жиналыста қаралған негізгі мәселелердің бірі осы болған. Жиынға Финляндия мен Швеция да қатысқан.

НАТО-да қазір 30 мемлекет бар. The Times басылымының Еуропадағы дереккөздері Финляндия мен Швецияның НАТО-ға кіруі одақтың әлеуетін арттырады деп отыр.

Аталған екі ел осыған дейін бейтарап болып келген. Алайда Ресей Украинаға басып кіргелі НАТО-ға кіру мәселесін қызу талқылай бастады.

Францияның Societe Generale дейтін қаржы конгломераты Ресей нарығынан кетеді. Компания Ресейде 1993 жылдан бері істеп келген

Societe Generale конгломератына қарасты Росбанк пен оның сақтандырумен айналысатын мердігер компаниялары ресейлік олигарх Владимир Потаниннің "Интеррос" компаниясына сатылады.

Росбанк бұрын онсыз да "Интеррос" меншігінде болған. Бірақ 2006-2011 жылдары банктің бақылау пакеті Societe Generale конгломератына өткен.

Сатылым осы аптаның соңында жүзеге асады деп күтіліп отыр. Әзірге бағасы айтылмады. Тараптар монополияға қарсы мекеменің мақұлдауын күтіп отыр.

11 сәуір күні Финляндия Ресей және Беларусь елдерімен пошта қатынасын тоқтатты. Бұл туралы елдің мемлекеттік компаниясы Posti мәлімдеді. Компания бұл шешімді "Әлемдік пошта одағының келісімдеріне сүйене отырып" қабылдағанын айтты.

Пошта қызметіне қажет мекенжайға жеткізе алмаған сауқат пен хаттар жіберушіге қайтарылады. Ал коммерциялық сауқаттар, жүктер мен шұғыл хаттардың жіберілуі 15 наурызда-ақ тоқтатылған деді компания.

Дүниежүзілік банк: Украинадағы соғыс пен Ресейге салынған санкция Қазақстанға да әсер етеді

Украинадағы соғыс пен Батыс елдерінің Ресейге салған санкциялары күллі әлем экономикасына қиын тиіп жатыр. Ол әсіресе Еуропа пен Орталық Азиядағы дамушы елдерге қатты соққы болды. Бұл туралы Дүниежүзілік банктің осы аймақтағы елдердің экономикасы жайлы жаңартылған шолуында айтылған.

Дүниежүзілік банк Ресей басқыншылығы салдарынан Украина экономикасы шамамен 45,1 пайызға дейін қысқарады деген болжам жасаған.

Импорт тауарларының 40 пайызы Ресейден келетін Қазақстанда 2022 жылы жалпыұлттық ішкі өнімнің ұлғаюы 1,5 – 2 пайызға дейін бәсеңдейді деп болжайды халықаралық ұйым.

Ал Ресейдің жалпыұлттық ішкі өнімінің көлемі биыл 11,2 пайызға дейін төмендейді дейді Дүниежүзілік банк.

Украинадағы соғыстың жетінші аптасы. Негізгі ақпарат:

• Украина билігі Киев облысы Бузовая ауылында ондаған бейбіт адам жаппай көмілген жер табылғанын хабарлады. Өңірден таяуда ғана Ресей әскері кеткен.
• Облыс басшысы Тарас Дидыч Бузоваядан өтетін негізгі жолда қалған ондаған мәшине ішінде де мәйіттер жатқанын айтты.
• Украина қарулы күштері Ресей сарбаздары көмілген жер Харьковтен сегіз шақырым жердегі Ольховка селосынан табылғанын хабарлады. Бұл ақпаратты растау, я болмаса терістеу соғыс жағдайында мүмкін емес.
• Украина бас прокуратурасы Ресей басып алған Киев облысында 1222 бейбіт адам қаза болғанын растады.
• Өткен аптада зымыран шабуылы жасалған Краматорск теміржол вокзалында қаза болғандар 52 адамға жетті.
• БҰҰ босқындар ісі жөніндегі агенттік соғыс басталғалы бері Украинадан 4,3 млн адам босып кеткенін мәлімдеді.