Қатты жел шатыр мен қаптамаларды жұлып алды

29 наурызда Атырау қаласында  жылдамдығы секундына 22-28 метрге жеткен желдің  салдарынан 9 төтенше жағдай тіркелді.

Атырау облысы Төтенше жағдайлар департаменті жедел құтқару жасағының құтқарушылары күшейтілген режимге көшірілді. 

- Қатты желдің салдарынан 6 тұрғын үйдің шатыр бөліктері ұшып кетті: Қ.Сатпаев,  М.Баймұқанов, 39а, Қожақаев, 27, М. Әуезов, 57, Азаттық даңғылы, 72, ал Алмагүл, №2 үйдің қаптамасы түсіп қалды. Сонымен қатар, Ақжар поселкесіндегі «Ақбөбек» және Нурсая №29 мекен-жайында орналасқан 2 балабақшаның шатыр бөліктеріне желден зиян келді. Мақат ауданында Әлиев көшесі, №80/3 мекен-жайындағы көпқабатты тұрғын үй шатырының бір бөлігі ұшты, - деп хабарлайды Атырау облысы ТЖД қоғаммен байланыс тобы.

Құтқарушылар алпинистік құрал-жабдықтарды пайдалана отырып, бүлінген шатырларды орнына нығайтып, көлік жолына түскен шатырларды жинап алды. 

Тұрғындарға жедел көмек көрсету үшін Атырау облысы Төтенше жағдайлар департаментінің 20 құтқарушысы мен 4 техникасы жұмылдырылды. 

- Сағат 15.10-да Атырау облыстық кардиологиялық орталығының 3 қабатты ғимаратының 100 шаршы метр алаңындағы шатыры ұшты. Зардап шеккендер жоқ. Апатты жағдайды жою үшін 4 қызметкер мен 1 техника шықты, - дейді ТЖД өкілдері. 

Атырау облысы денсаулық сақтау басқармасы баспасөз қызметінің ақпараты бойынша, облыстық аурухананың травматология бөлімшесіне 3 адам көмекке жүгінген. Үшеуі де қатты желден қақпаны жаба алмай, зардап шеккен. Бір науқастың қолы сынып, травматология бөлімшесіне орналастырылды. Қалғандары амбулаториялық көмек көрсетілгеннен кейін үйіне жіберілді. 

Дайындаған Ләззат ҚАРАЖАНОВА