18 наурыз күні Мақат кентінде «Ақтау+НШ» ЖШС жұмысшылары наразылыққа шығып, еңбекақыдан бастап бірқатар талап қойды.
Аудандағы тазалық жұмыстарымен айналысатын жұмысшылар осы кезге дейін бірнеше рет талаптарын қойғанымен, орындалмай келе жатқанына наразы екенін ашына жеткізді.
- Мынадай қымбатшылықта көше сыпырушылардың алатын айлық жалақысы 85 мың теңге, ал көлік жүргізушілер 112 мың теңге алады. Мұнымен біз қалай өмір сүреміз, отбасымызды қалай асыраймыз? Тапсырысшы - аудандық әкімдік неге бұл тазалық мекемесінің жұмысын қадағаламайды? Еңбекақыны дұрыс төлейтін мекемені таңдау керек, - дейді Бейбіт ҚОЙШЫБАЕВ, Қайырбек ЖАҢАБАЕВ және т. б.
Наразылық танытушылармен тілдесуге аудан әкімінің орынбасары Бекәділ ЖАЙКИН мен аудандық ТКШ бөлімінің басшысы Темірбек ІҢІРБАЙ келді.
- Айтыңызшы, ал сіздің айлық еңбекақыңыз қандай? - деп сұрады жиналғандар Б.Жайкиннен. Жауапты үнсіз қалдырған ол еңбекақыны өсіру жөнінде бұдан бұрын да жиналыс болғанын, жалақы өскенін айтты.
- Жалақыны бір рет көтерді, ол да мардымсыз. Бізге аудан әкімі керек! - деп ашуланды жұмысшылар.
Көп кешікпей аудан әкімі болып екі апта бұрын тағайындалған Ринат ИБРАГИМОВ келді:
- Жай-жапсарға дұрыстап қарайық. Жұмысты тоқтатпаңыздар. Ал талап-тілектеріңізді қағазға түсіріп, бізге беріңіздер.
37 адам дайындап, қол қойған талап хатта бірнеше мәселені шешу талап етілген: еңбекақыны көтеру, «Ақтау-НШ» ЖШС-мен жұмысты тоқтату, коммуналдық мекеме ашу, босалқы бөлшектермен қамтамасыз ету, жұмыс уақыты 8 сағат, 5 күндік болып белгілеу және т.б.
Ләззат ҚАРАЖАНОВА