Атырауда өңірлік есірткі жеткізуге қатысы бар деген күдіктілер ұсталды, деп хабарлайды ҰҚК баспасөз қызметі.
«2022 жылғы 6 наурызда Атырау қаласында ҰҚК департаментінің қызметкерлері каннабистік топтағы есірткіні өңірлік жеткізу арнасына қатысы бар деген күдікпен ҚР-ның 3 азаматын ұстады.
Биылғы 7 наурызда топтың тағы бір қатысушысы ұсталды. Алдын ала деректер бойынша, ол есірткі арнасын ұйымдастырушы болған.
Процессуалдық іс-шаралар барысында заңсыз айналымнан 61 келіден астам «марихуана» есірткісі алынды, оның қара нарықтағы құны 60 млн теңгеден артық сомаға бағаланып отыр.
Осы фактілер бойынша сотқа дейінгі материалдар ҚР ҚК-нің 297-бабы 3-тармағы бойынша сотқа дейінгі тергеп-тексерудің бірыңғай тізіліміне тіркелді.
Атырау облысының тергеу соты аталмыш тұлғаларға қатысты қамауда ұстау түріндегі бұлтартпау шарасын санкциялады», - делінген хабарламада.