Атырауда жыл сайын 12 мыңға жуық адамды жұмысқа орналастыру жоспарланады. Бұл туралы брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Азамат МӘМБЕТОВ мәлімдеді.
Оның айтуынша, бүгінде облыста 6 798 жұмыссыз тіркелген. ТШО-ның Келешек кеңею жобасының аяқталуына орай мамыр айына дейін 3 265 адам жұмыстан босатылады. Оның 1 455-і Атырау тұрғындары. Әрі қарай бұл көрсеткіштер көбейеді, осыған байланысты «жаңа» жұмыссыздарды одан әрі жұмысқа орналастыру жоспары әзірленді.
- Мемлекеттік бағдарламалар аясында жыл сайын 10-12 мың адамды жұмыспен қамтуды жоспарлап отырмыз. Атырауда қазір мұнай-химия салаларын дамыту мақсатында ірі инвестициялық жобалар жүзеге асырылып жатыр. Соның бірі - полиэтилен өндірісі бойынша интеграцияланған газ-химия кешені құрылысының екінші кезеңі басталады. Одан бөлек, Қашаған кен орнының газын қайта өңдеу зауытының құрылысы жүріп жатыр. Бұл жобаларға жергілікті тұрғындарды көбірек орналастыру жоспарда бар, - деді Мәмбетов.
Бұған дейін Мәмбетовтың орынбасары Еркебұлан ӘБІЛҚАСЫМОВ мұнай-химия кешенінде инвестициялық жобаларды жүзеге асыру кезінде 20 мыңға жуық адамды жұмыспен қамту жоспарланғанын хабарлаған еді.
Айнұр САПАРОВА