18 жастағы Атырау тұрғыны, бала кезінен ІІ топ мүгедегі Артур ҚОЖАНИЯЗОВ полиция департаментіне 7 қаңтарда оны ҚПБ полицейлері ұрып-соғып, тонап кеткенін айтып арызданған.
А.Қожаниязов «АЖ» тілшісіне сол күні зейнетақысын алып, досымен бірге сауда орталығына азық-түлік алуға барғанын айтты. Көшеде оларды полиция тоқтатып, ҚПБ-не жеткізген. Оның айтуынша, сол жерде Артурдың телефоны мен ақша салынған әмиянын тартып алып, ұрып-соға бастаған. Әсіресе, бір сержант ерекше құлшыныс танытқан.
- Ауру жаныма батып, бүкіл этажды басыма көтеріп айқайладым. Досым жедел жәрдем шақырып, облыстық ауруханада кеуде қуысының соғылуы деген дагноз қойды. Қазір үйде емделіп жатырмын, бүкіл денем әлі ауырады, - дейді Артур. Неліктен «тәртіп сақшыларының» оны ұстағанын, ұрып-соққанын, тіпті, тонап кеткенін түсінбей дал. Өйткені зейнетақысы салынған әмиянын қайтармаған.
Полиция департаменті қызметтік тергеу басталғанын хабарлады. Айтпақшы, отбасында сол сержанттың суреті бар, сондықтан оны және басқаларды табу қиынға соқпайды.
Фархат АБИЛОВ