«Денесінің 90 пайызын күйік шалған»: Атырауда газ қазандығының жарылуы салдарынан үш адам ауыр жарақат алды

10 қарашаға қараған түні Балауса ықшамауданындағы тұрғын үйде жылыту қазандығы жарылған. Өрт кезінде үш адам ауыр жарақат алып, облыстық ауруханаға жатқызылды.

ТЖД баспасөз қызметінің хабарлауынша, сағат 01:24-те Балауса ықшамауданының 24-көшесіндегі жеке тұрғын үйде табиғи газбен жылытылатын қазандықта газ-ауа қоспасы жарылып, артынан шатыры мен жалпы ауданы 120 шаршы метр бөлмелер өртенген. Оқиға орнына жеткен өрт сөндірушілер өртті сағат 02:40-та сөндірді.

Денсаулық сақтау басқармасы зардап шеккендердің екеуі жансақтау бөлімінде жатқанын хабарлады: 19 жастағы жігіттің денесін 90%, оның құрдасын 85-90% күйік шалған. Қазір екеуі де ИВЛ аппаратына қосылған. 1999 жылы туған қыз 25-30% дене күйігімен нейротравматология бөлімінде жатыр.

Дайындаған Айнұр САПАРОВА

ТЖД жолдаған суреттер