17 тамызда жүре бастаған «Атырау Д.Нұрпейісова атындағы станса» бағытындағы пойыздың жүру кестесі тұрғындардың сұранысына орай өзгертілді.
Бұрын олар Атырау стансасынан Нұр-Сұлтан уақыты бойынша сағат 12.00-де қозғалып, кері «Д.Нұрпейісова ат. станса – Атырау» бағытына 19.42 сағатта қозғалып, облыс орталығына түн ортасында, ыңғайсыз уақытта жететін. Енді пойыз құрамы жергілікті уақытпен Атыраудан 18:10-да шығып, Д.Нұрпейсова бекетіне 00:36-да келеді. Кері қайту уақыты Д.Нұрпейсова бекетінен 01:16-да шығып, Атырауға таңғы 07:39-да келеді.
- Құрманғазы, Исатай аудандарының тұрғындары облыс орталығына қандай да бір шаруаларымен келеді. Оларға күндізгі уақыт қолайлы. Сондықтан, жолаушылардың ұсынысын ескеріп, «Қазақстан темір жолы» АҚ-мен келісе отырып, пойыздың жүру уақыты өзгертілді, - деді облыстық жолаушылар көлігі және автомобиль жолдары басқармасының басшысы Самат АЙТҚАЛИЕВ.
Тағы бір өзгеріс – пойыз құрамында санитарлық талапқа сай 208 орынға арналған 4 плацкарт вагон бар, ал жалпы вагон қарастырылмаған. Алғашында тек үш вагон болған еді - екі жалпы және бір плацкарт вагоны.
Зульфия ИСКАЛИЕВА