13 тамызда таңертең Балықшы көпірі жөндеуге жабылады

Қанша уақытқа созылатыны әлі белгісіз. Бұған дейін «АЖ» көпірдің жіктері ажырағанын, ортасына қол сыйып кететінін, жол төсемінде шұңқыр көп екенін хабарлаған болатын.

- 13 тамыздан (жұма) бастап, Балықшы ықшамауданындағы көпір арқылы көлік қозғалысының тоқтағанын хабарлаймыз. Жөндеу жұмыстары кезінде көпір құрылымының тозып майысқан жіктерін бұзып, ауыстыру, сондай-ақ, жол төсемін жамау жұмыстары жоспарланып отыр, - деп хабарлайды «АтырауИнжСтрой» ЖШС.

Еске салсақ, Балықшы-Жұмыскер көпірі «Трансстроймост» АҚ (Алматы) жобасы бойынша салынған, 2008 жылы пайдалануға берілді. Жалпы ұзындығы 511,4 метр, жолдың ені 18,1 метр. Көпірден күніне 7 мыңға дейін көлік өтеді.

Фархат ӘБІЛОВ