​Атырауда автомұнараның ақауынан электр жөндеуші қаза болды, екіншісі ауыр халде

11 тамызда, күндіз «Атырау Жарық» АҚ электр жөндеушілер бригадасы автокөтергіш пайдаланып, жоғары кернеулі желіге электр сымдарын орнатып жатқанда, жөндеушінің бірі қаза болды.

Манипулятордың көтергіш жебесі үзіліп жерге түскенде, үстінде екі жөндеуші болған 6-7 метр биіктікте тұрған алаңшаны астына басып қалды. Нәтижесінде екеуі де ауыр жарақат алды, біреуі кейін облыстық ауруханада қайтыс болды. Екіншісінің жағдайы ауыр, дәрігерлердің бақылауында.

- 1998 жылы туған науқас облыстық аурухананың жансақтау бөлімінде ауыр халде жатыр. Диагнозы: аралас жарақат, сол жақ жауырыны шытынап сынған, сол жақ иығы сынған, сол жақтан төрт қабырға сүйегі сынығы, жамбас сүйегі сынған. Науқасты ота жасатуға дайындап жатыр, - деп хабарлады денсаулық сақтау басқармасының баспасөз қызметі.

Атырау облысы полиция департаменті хабарлағандай, «Атырау Жарық» АҚ-ның 1979 ж.т. қызметкерінің  өліміне қатысты ҚР ҚК-нің 156-бабы 3 бөлігімен («Абайсызда адам өліміне әкеп соққан еңбектi қорғау қағидаларын бұзу») сотқа дейінгі тергеу амалдары жүргізілуде. Сот-медициналық сараптама тағайындалды.

Ләззат ҚАРАЖАНОВА

Сурет әлеуметтік желіден алынды