Былтыр коронавирус негізінен 50 жастан асқан адамдарға әсер етсе, бүгінде 30 жастан 49 жасқа дейінгі орта буын ауырып жатыр. Бұл туралы брифингте Атырау облыстық санитариялық-эпидемиологиялық қадағалау департаменті басшысының орынбасары Әлия БЕКЕШЕВА мәлімдеді.
Коронавируспен аурудың көбеюі 25 маусымда басталды. Сол күні 89 науқас тіркелді, ал бүгінде олардың саны 290, олардың 70%-ында ауру белгілері бар. Ауру олар медициналық мекемелерге жүгінген кезде расталып отыр. Анықталған науқастардың бір бөлігі – ауырған адаммен байланыста болғандар және профилактикалық тексеруден өткендер.
- Эпидемиологиялық тергеу барысында адамдардың 80%-ы карантин шараларын бұзып, той-садақаға қатысқан кезде инфекция жұқтырғаны анықталады. Былтыр шілдеде коронавирустан көз жұмғандар көп болды, қазір туыстары жылдық еске алу қадесін жасап жатыр, сондықтан бәрі қайталануда, - дейді А.Бекешева.
- Вирустың таралуына оның мутациясы да ықпал етеді, - деді облыстық денсаулық сақтау басқармасының басшысы Асхан БАЙДУӘЛИЕВ. Бұрын кең таралған Альфа штаммын жұқтырған науқас, әдетте, 4-5 адамға ауру жұқтырса, енді Дельта штаммы бар науқас 7-8 адамға жұқтырады: жаңа штамм жоғары дәрежеде ауру қоздырғыштығымен ерекшеленеді.
Зульфия ИСКАЛИЕВА