Психдиспансер Талғайраңға «көпбейінді аурухананың» қасына көшеді

«Психикалық денсаулық орталығы» Талғайраңға көшеді, ал бұрынғы психдиспансердің орнында жаңа денсаулық сақтау немесе білім беру мекемесін салу жоспарлануда.

Бұл туралы журналистерге облыстық денсаулық сақтау басқармасының бастығы Асхан БАЙДУАЛИЕВ хабарлады. Оның айтуынша, өткен ғасырдың ортасында салынған психдиспансер ғимараты физикалық және моральдық тұрғыдан ескірген. Бірақ нысанның өзен жағасында жақсы жерде орналасқанына қарамастан, жаңа ғимарат басқа жерде салынады.

- 2019 жылы Қазақстанда психиатриялық және наркологиялық қызмет біріктірілді. Авангардтағы біріктірілген кешенге орын аз болады. Сондықтан «Психикалық денсаулық орталығының» жаңа ғимараты Талғайраңда, көпбейінді аурухананың қасына салынады, - деді Байдуалиев. Оның айтуынша, психдиспансердің бұрынғы орнына, бәлкім, МЖӘ аясында оңалту орталығын немесе мектеп тұрғызуы мүмкін.

Бұрынғы жұқпалы аурулар стационарының орнына оңалту орталығын да салуды жоспарлағаны есімде. Өзен бойындағы қаланың халық көп жүретін әдемі жерін қонақ үй апартаменттері мен қоғамдық тамақтану сервистік қызмет көрсету пункттері бар медициналық оңалту орталығын салуға беру туралы шешім қабылданды. 2018 жылғы наурызда «Атырау ӘКК» АҚ «Estate Sevice» ЖШС-мен жобаны бірлесіп жүзеге асыру туралы келісімге қол қойды, ал сәуірде «“Estate Corporation Group-Atyrau” басқарушы компаниясы» ЖШС бірлескен кәсіпорны құрылды.

ӘКК жобаға жалпы аумағы 1,0028 га жер учаскесін қосты, ал «Estate Sevice» ЖШС оңалту орталығын салу және пайдалану бойынша барлық қаржылық шығынды өз мойнына алды. Жоба құны 5,8 миллиард теңгені құрады. ӘКК баспасөз қызметі сол кезде физикалық және психикалық мүмкіндігі шектеулі жандардың еңбекке қабілеті мен денсаулығын қалпына келтіру бойынша медициналық, психологиялық, педагогикалық және кәсіби шаралар кешенін өткізу жоспарланып отырғанын хабарлады. Оңалту орталығы жыл сайын 53 мыңнан астам пациентке қызмет көрсетеді деп жоспарланды. Құрылыс 2020 жылдың желтоқсанында аяқталады деп жоспарланды.

Бірақ содан кейін, әдеттегіше «бірдеңе дұрыс болмады». ӘКК өз үлесін инвесторға - «Estate Service» ЖШС-не сатты, бірақ коммерциялық құпияға сілтеп, мәміле сомасын жарияламады.

- ӘКК «Estate Service» ЖШС-нен жобаны жүзеге асыру тұрғысында серіктестікке қатысушылардың шешімін орындау бойынша кепілдеме міндеттемесін алды. Оңалту орталығының жұмысы коммерциялық негізде жүзеге асырылады, - деп жауап берді «Атырау» ӘКК «АЖ»-ға.

Яғни, жоба коммерциялық сипатқа ие болды, егер компания өз міндеттемелерін орындамаса немесе басқа объект салса, оған айыппұл салынады деген келісімге келді. Корпорация ықтимал айыппұл сомасын да жарияламады.

Жаңа нысанды тапсыру мерзімі созылып кетті. Енді міне қайтадан оңалту орталығының құрылысы туралы әңгіме жүріп жатыр.

Зульфия ИСКАЛИЕВА